Pasalṭha Khuangchera'n Savawm a luhchhuahna hmu chhuak

Mizo pasalṭha huaisen sawi apianga sawi lan loh theih loh, Khuang­chera'n savawm hliam a luh­chhuahna puk, 'Aia puk' chu Chhippui Branch YMA-ten an hmuchhuak.

Central YMA hnen aṭanga lehkha an hmuh 'Khua/veng indin dan ṭobul, hming put chhan, history, khûa leh veng aṭanga mi hmingṭha leh chhuanawmte chanchin CYMA record-a vawn ṭhat tur theh lut tura' tihna bawhzuiin Chhippui Br. YMA-te chuan he puk zawn chhuah hna hi ngawrh takin an bei a ni.

Chhippui Branch YMA chuan Mizo pasalṭha huaisen Khuang­chera chu Chhippui khuaah a awm ngei a ni tih leh, a huaisenzia a lanna pakhat savawm kah hliam a luh chhuahna puk pawh a awm ngei a ni tih Mizo history aṭang leh upate thu inhlan chhawn aṭangin an hriat chu finfiah ngei an tum a ni.

Puk zawnchhuahna tura mi chi hrang hrang an biak zinga mi Rosanga (91), tuna Nursery Veng, Aizawla cheng mêk, Chhippui khaw chhuak chuan Khuangchera chu Chhippui khuaah a awm ngei a ni tih leh, savawm hliam a beihna puk pawh Vâisam ram Lallen khaw ep, tuna Mauhâk rama puk awm chu, upate thu inhlan chhawn aṭangin, Aia Puk tia a lo hrilh thu Chhippui Branch YMA chuan an sawi.

Heng an thu hriatte bawhzui hian Chiappui YMA member-te chu puk zawng hian an thawk chhuak a, August 9, 2017 khan he puk hi an hmuchhuak a ni. Puk hi an khaw kawtchhuah aṭanga mt. 810-a hla niin, a puk chhung zau lai ber hi ft. 10 a ni a, a dung hi ft. 35-a sei a ni.

Khuangchera hi 1850 vel khan Lal Lianphunga khua Kanghmuna piang nia sawi a ni a, Ralte Kawlni Kawltung hnam a ni. A pa chu Thangṭhiauva niin, a nu chu Thangluaii a ni.

Khuangchera hi a pian en maia zuamawm deuh niawmin lang mah se, en chian erawh chuan a pian a ṭha hle niin an sawi. Kum 1870 vel khan Lianphunga hian Parvatui khua a din a, Kuangchera te chhungkua pawh hi an pem lut ve nghal a ni.

Rawlthar a nih laiin an khaw pasalṭha Suakchhunga’n savawm a kâp hliam a, a tûka an khaw pasalṭhaten sa hliam an chhui ṭumin a tel ve nia sawi a ni. Savawm chu pûk pakhatah an chhui lut ta a, tumahin an luhchhuah ngam loh avangin Khuangchera chuan a ning ta a, “Ka han sât hlum teh ang,” tih leh chempui nen puka luh chu a rual ta a, savawm chuan huk chungin a rawn bawh nghal a, mahse pasalṭha dangte'n an lo kap hlum hman nia sawi a ni.