Zofate Chawlhbuk ṭhiah a ni

MZP chuan February 27 khan Bairabi hmuna Roneihthangi W/o Ch. Chhunga(L) nupuiin Bairabi Zophaia hmun a pekah Zofate Chawlhbuk an sa a, chawlhbuk hi February 27 vek zanah ṭhiah leh nghal a ni.

MZP tarlan danin, Zofate Chawlhbuk sak hnatlangah hian MZP member bakah Bairabi khawtlang hruaitute an thawk chhuak a. Chawlhbuk sakna tur hmunah hian banner leh ṭhutthleng sei dah lawk a ni a, zing kara hnatlang thawk chhuak hmasate an va kalin banner leh ṭhutthleng chu Assam Police lamin lo lain an motor-ah an lo hlang vek a, hnatlang tura kal hmasain an laksak leh a ni. Chawlhbuk hi a vang fit 6 leh a dung fit 12-a zaua sak a ni.

Mipui nawlpui ṭin hnuin Bairabi MZP hruaituten vengin an awm chilh nghal a, zan dar 8:30 vel hnuah intifai turin an hawsan. Bairabi MZP hruaitute haw lai zan 9:15 - 10 inkarah Assam Police leh Assam Forest department-te'n JCB hmangin a ruka ṭhiatin bungrua zawng zawng nen an ru bo vek a ni. He thil thleng avang hian Bairabi MZP chuan Bairabi PS-ah FIR an thehluh nghal a ni.

MZP chu nimin khan Zofate Chawlhbuk ṭhiah a nih chungchangah hian nimin khan an ṭhukhawm a, chawlhbuk hi sakṭhat leh ngei nise an ti a, a sak hnatlanga tel turin Mizo mipui zawng zawng an sawm.

MZP chuan Zofate Chawlhbuk ṭhiah leh a ni chu pawi an tih thu sawiin, "A ruka rala ṭhiah a ni chu kan lawm lo hle a ni. A ṭhiattu Assam Police thu petu Assam Sorkar kan dem tak meuh meuh a ni. Zofate Chawlhbuk hi March 8, 2018 ah sak ṭhat leh tura ruahman a ni," an ti.

Zofate Chawlhbuk ṭhiattute chu March 5, 2018 ral hma ngeia chhuichhuak tur leh man an nih ngei theihna tura hma la turin Mizoram sorkar an phut a, "Bungraw bo zawng zawng pawh MZP kut a dah ngei turin kan phut a ni," an ti a, bungrua hi an hmu lo a nih chuan zangnadawmna pe ngei turin MZP chuan Mizoram sorkar thuneitute a phut a ni.