Mizoram police sawn kualna senso Sorkarin Rs. 2,20,07,362 a la bá

Mizoram sorkar chuan police unit 27-a police-te thawhna hmun a sawn kualna atan kum thum chhungin Rs. 6,28,75,705 a séng a, chu'ng zinga Rs. 2,20,07,362 chu sorkarin a la pe lo.

Vanglaini-in RTI Act hmanga a zawhna Police Headquarters SPIO-in a chhan danin, Mizoram police unit hrang hrang 27-a mite sawn kualna atana senso, kumin June thla tàwp lam thlenga an chhin chhiah ang chuan kum 2018-19, 2019-20 leh 2020-21 chhungin police sawn kualna senso atan Rs. 6,28,75,705 hman a ni.

Kum thum chhunga police sawn kualna atana sum hmang tam zual unit pariat chuan cheng nuai 30 aia tam an séng vek a; sum hmang tam zual pathum chu - SP, Aizawl Rs. 79,28,900, SP Wireless Rs. 50,18,570 leh 3rd IR Rs. 49,47,965 a ni.

Hetih lai hian, DIG (Southern Range)-in kum 2019-20 leh kum 2020-21 chhungin transfer atan sum hman an nei lo a; district thar pathum - Saitual, Khawzawl leh Hnahthiala SP office-te'n kum 2018-19 chhungin transfer na sum hman an nei lo bawk.

Police unit 27 zinga thawktu sawn kualna atana sum séng tlem zual pathum chu - SP Traffic Rs. 31,599, SP CID Crime Rs. 3,35,558 leh DIG (Southern Range) Rs. 5,64,377-te a ni. SP CID (Special Branch)-in Rs. 9,49,444 leh PTS Thenzawlin Rs. 7,75,803 an hmang a; a dang zawng chuan cheng nuai 10 chung lam vek an hmang. Police sawn kualna atana sum hman hi Govt of Mizoram OM no. G.14019/1/2020-F.Est/135 dt 18.02.2019 (based on FRSR part II rule 116) tlawhchhana hman a ni.

June 25, 2021 thlenga police sawn kualna atana sum pek tur la pek loh (batsak) unit 21 an awm a; police unit dang paruk - DIG (SR), PHQ, SP Saitual, SP Khawzawl, SP Hnahthial, 2nd IR-te chu transfer-na sum hmante pek vek a ni tawh thung. Sorkarin police transfer sum a la bat chu Rs. 2,20,07,362 a tling.

Transfer-na sum sorkarin a batsak zingah hian cheng nuai 10 chuang batna unit sarih a awm a, chu'ngte chu - SP Aizawl, SP Siaha, SP Kolasib, SP Mamit, SP Wireless, 3rd IR leh 4th IR-te a ni.