Congress sorkarin a hnathawkte an rawk - MNF Vigilance leh Legal dept.

MNF Vigilance leh Legal dept. chuan, nimin khan Aizawl Press Club-ah thuthar thehdarhtute kawmin, Congress kaihhruai sorkar chu a hnathawkte rawk mekah an puh a, "Hei hi rorelna dik lo lang chhuak pakhat a ni a, ram kaihruai zel tura rintlak tawh lo an ni tih entirnaah kan ngai," an ti.

MNF Vigilance leh Legal dept.-a secre­tary David R Lalsawm­tluanga chuan sorkar hnathawkte'n GPF Rules-in a phut angin an mamawh huna lak chhuah leh turin thla tin an hlawh aṭangin pawisa an dah ṭhat ṭhin thu sawiin, "Pawisa hi sorkarin a kawlsak a ni. Pawisa dah ṭhatu chuan dan angin ama pawisa chu danin thuneitu atana a siam Head of Office/DDO phalnain a la chhuak ṭhin tur a ni," a ti a, Congress sorkar chuan GPF Rules an zawm loh thu a sawi.

R Lalsawmtluanga sawi danin, Congress sorkarah chuan GPF hi Chief Minister, Finance Minister, Parliamentary Secretary leh Finance Secretary-te chu bithliah awm loin an pe chhuak thei a, Finance department-a Superintendent chunglam zawng zawng hnenah quarter khat atan cheng nuai 80 ṭheuh quota angin reserve fund an inpe a ni.

India rama sorkar hnathawkte GPF en­kawlna GPF Rules ang lo taka Congress kaihhruai sorkarin a kalpui chhan chu hriatthiam harsa an tih thu sawiin R Lalsawmtluanga chuan, "A pawisa neitu sorkar hnathawkten anmahni pawisa lachhuak turin minister laina hnai takte leh Congress Bhavan lam mi leh sate leh quota nei officer ṭhenkhat hnen atanga 5% - 10%-a lei a ngai nia sawi awmte hi a dik leh dik loh chhuichhuaka, a dik a nih chuan a titute hrem ngei tur leh an sum lak tawhte pe kir leh turin sorkar kan phut," a ti.

MNF Vigilance leh Legal dept. chuan Dearness Allowance leh Dearness Relief tor Pensioner-te a hun takah Congress sorkarin a pek chhuah theih loh thu an sawi a, "Hei hi sorkar hnathawk leh pension tawhten an tuar nasa hle. Ni 1.07.2010 aṭanga 1.01.2017 inkar chhung ringawtah sorkar laipuiin a release huna Mizoram sorkarin a pek ve theih loh tlingkhawm chu sorkar hnathawk tan thla 104 leh pensioner-te tan thla 123 a tling a ni," a ti.

MNF Vigilance leh Legal dept. tarlan danin, ni 1.01.2017 hnua 3% (139% DA) hi pensioner-te vawiin thlengin pek an la ni lo. Heng bakah hian sorkarin DA pung 72% hi Group A,B leh C-te tihluihna-in an GPF-ah a dah luihsak a, Group D chu 36% tihluihna bawkin an GPF ah a dahluih sak bawk a ni.