Samthang-in kuminah zikhlum Rs. 26,40,000 man hralh tawh

Champhai district-a Samthang khaw mite chuan tunlai hian fûr zikhlûm an thar vanglai a ni a, hralh chhuak mekin, Rs. 26,40,000 man an hralh tawh. Kuminah hian quintal 4,000 vel thar an inbeisei.

Samthang Farmer Association secretary Kapchhunga sawi danin, Samthang khuaa zikhlum tharte chu sorkarin a ruahman vegetable supply chain-ah tam tham tak an pe a, mimal hralh chhawng turte hnenah eng emaw zat an pe bawk. Quintal 1,100 an hralh tawh a, kg. khat Rs. 24 leh Rs. 30-in an hralh a, a vaiin Rs. 26,40,000 man an hralh tawh a ni.

Kapchhunga chuan, zikhlum chu July thla chawhnu lam aṭangin an hralh ṭan a, sorkarin vegetable supply chain a kalpui avang leh Assam-ah kawngpui dan a nih avangin an hralh ṭha niin a sawi a, "Motor-in Aizawlah kan rawn phur thla a, chu chu kg. khat Rs. 30-in vegetable supply chain lamin min leisak a, hralh tur kan ngah avangin ka duh ang erawh chuan an la vek thei lo. Sorkar hriatpuinain commission lamin kan khuaah kg. khat Rs. 24-in an rawn la thung," a ti.

Kumina fûr zikhlum an thar chu quintal 4,000 vel a nih an ring tih sawiin Kapchhunga chuan, kum hmasaa an thar qtl. 5,000 vel chu an pha dawn lo tih a sawi a, "Kuminah khua a khen rei avangin a hunah kan phun hman lo a, kan phun hnuah pawh pangangin an ei nasat avangin kan beisei ang kan thar dawn lo," a ti a; zikhlum chu Thawhṭanni leh Ningani-ah an hralh ṭhin a, chawlhkar khatah ip 1,000 chuang hralh tur a awm ṭhin thu leh vegetable supply chain-ah ip 300 vel an lak theih thu a sawi.

Vegetable supply chain chu kum dangah pawh awm zel se a duh thu sawiin, Kapchhunga chuan, awmze neia kut hnathawktute a chawikanna nia a hriat thu a sawi a; commission lamin an laksak lai chuan a tira a rate aia tlâwmin chawlhkar khat hnuah a tlahniam zung zung ṭhin tih a sawi a ni.