Assam police-in MP Vena man tum? Police kap hlumtu hrilh thei nuai 5 pek tiam

Mizoram Rajya Sabha MP K Vanlalvena chu July 26-a Vairengte daia inkahna thlenga a inhnamhnawih dan chhui tur leh, dan anga a chungchang ngaihtuahtu tur Assam police mite New Delhi-ah tirh an nih thu Assam DGP Gyanendra Pratap Singh chuan nimin khan a sawi.

Assam DGP hian he thu hi nimin tlai khan Twitter hmangin a puang a, Mizoram MP hi Vairengte daia thil thleng chungchanga media-a a interview-na behchhana he thil thlenga a inhnamhnawih dan an chhui tur thu leh, chumi bawhzui tura CID officer telna Assam police mi leh sate New Delhi-ah an tirh nghal thu a sawi.

Hetihlai hian Assam DGP chuan July 26-a inkahnaa Assam police kap hlumtute man chhuak tura hrilh thei an awm chuan Rs 5,00,000 an pek tur thu a puang zui bawk a ni.

Assam DGP chuan inkahnaa inhnamhnawih Mizoram police leh mipuite thlalak dahna (picture) an siam thu leh, pawikhawihtute dan anga hrem an nih tur thu a sawi a; Dholai police station-ah case an ziak lut bawk niin a sawi.