CHILDLINE 1098 Awareness video tlangzarh

Naupang himna atana buatsaih CHILDLINE 1098 awareness video clip siam chu nimin khan video conference hmangin Legislative Assembly speaker Lalrinliana Sailo-in a tlangzarh.

Lalrinliana Sailo chuan, naupang dikna chanvo leh himna chu thil pawimawh a nih thu sawiin, "Ram roreltute pawhin kan level ṭheuha kan ngaih pawimawh tur a ni. Mizoramah ngei pawh naupang chhawmdawl leh ngaihsak ngai, harsatna tâwk eng emaw zat an awm a, chu'ng naupangte tana biak theiha Childline kan nei hi a lawmawm hle a ni," a ti a; Childline 1098 chu mipuiin ṭangkai taka an hman a beisei thu a sawi.

CHILDINE 1098 hi Ministry of Women & Child Development hnuaia project niin, India ram hmun hrang hrangah hna an thawk a, a tum ber chu naupang kum 18 la tling lote dikna chanvo humhalh a ni. Mizoramah chuan Centre for Peace and Development hmalaknain kum 2011 aṭangin Aizawl district-ah hna thawh ṭan a ni a, kum 2015-ah Mamitah hawn leh a ni.

Naupang tawhsual tâwk leh eng kawng pawha harsatna nei tan phone no. 1098 leh 9774222275-ah biak theih reng a ni.

Aizawla CHILDLINE chuan kum 2020-21 chhung khan naupang harsatna nei 474 an ṭanpui a, Covid-19 avanga ei leh bâra harsatna tâwk chhungkaw 322 hnenah ei leh in tur an pe bawk.