GAWSS Phase-III 83.50% zo tawh

State Investment Programme Management and Implementation Unit (SIPMIU), Aizawl chuan Tlawng lui aṭanga Aizawl khawpui tuia châwmna tur Greater Aizawl Water Supply Scheme (GAWSS) Phase-III an siam mek chu hna thawh tur zinga 83.50% an zo tawh.

Vanglaini palai zawhna chhangin SIPMIU hotute chuan, GAWSS Phase-III chu September 2020-ah siam zawh hman an inbeisei thu an sawi a, "Covid-19 lêng avangin harsatna kan tâwk. Covid lên hma chuan hna thawk mi 300 velte an awm a, tunah chuan mi 100 vel bak an awm thei lo. A tam zawk an khua (Mizoram páwn)-ah an haw. Tun hnaiah hna eng emaw chen kan thawk leh nã a, fûr ruahtui a tlak ṭan avangin duh anga chakin hna thawh theih a ni lo," an ti a; hna an zawh theih hun tur sawi lâwk a harsat thu an sawi.

SIPMIU hotute chuan, Covid-19 léng chu hmasawnna hna tam takin a tuar tih an sawi a, "SIPMIU hna pawhin a tuar tih hai rual a ni lo. SIPMIU hnathawh mek hi project lian tak a nih avangin thawktu mamawh zat pawh a sang a, thiam bik ngai hnate a nih avangin ram páwn aṭanga thawktu lak luh a ngai ṭhin," an ti a; hun tawn mil zelin hna an kalpui tih sawiin, "Hna thawktu awm ang angin ngawrh takin an thawk chhunzawm mek a ni," an ti.

GAWSS Phase-III chu hna thawh tur zinga 83.50% vel an zawh a nih tawh thu sawiin SIPMIU hotute chuan, "Project hi Asian Development Bank (ADB) funding a ni ṭhin a, ADB funding hun hi June 22, 2019-khan a tàwp tawh," an ti a; ADB funding a tawp hnuah ADB-in sum an pek chhunzawm loh thu an sawi.

SIPMIU hotute chuan, GAWSS Phase-III chu chhunzawm zel a nih theih nan Mizoram sorkarin theihtawp a chhuah tih sawiin, "UDPA changtu Dy. Chief Minister leh Chief Minister-te hmalakna azarah project hun pawhsei a ni," an ti a; Ministry of Urban Development & Poverty Alleviation-in hna thawhna tur sum a pek chhunzawm thu leh Covid-19 léng vangin sorkar laipuiin hun a pek belh leh an beisei thu an sawi.

SIPMIU hotute sawi danin, tunah hian Zohnuai aṭanga Vaivakawn inkar leh Chanmari West aṭanga Laipuitlang inkarah tui pipe phûm hmabak a awm bakah, Tlawng hmuna tui pump-na tur tuikhuah (weir) thawh hmabak a la awm.

GAWSS Phase-III tui pump khawl liante chu bun vek tawh a ni a, Setlâk pre-stressed bridge metre 35 (ft. 114) dawh mek a ni. Khawl lian châwmna tur 33-kv sub-station chu water treatment plant (WTP)-ah leh intermediate pumping station (IPS)-ah siam mek a ni a, Tlawngah vertical turbine pump vuahna tur raw water pump house sak mek a ni bawk.