Dan kalhin Mizoram Home Guard Director General post siam a ni

Gauhati High Court (GHC), Aizawl Bench chuan tun hnai khan thutlukna tichhuakin, Mizoram sorkarin Mizoram Police Service (MPS)-te tana Mizoram Home Guard (MRHG)-a Director General post a siam dan chu dan kalh a nih thu a puang.

Mizoram Home Guard-a Director General post siam a nih dan hi Mizoram Home Guard Association chuan an khing a. Court-a tarlan a nih danin, Mizoram Home Guards Act, 1985 hnuaiah Mizoram sorkarin Commandant General enkawlna hnuaia awm turin MRHG a din a, August 27, 2014-a Chief Secretary-in order a chhuah dan chuan, Commandant General chu grade pay 8,700 a ni.

August 27, 2014 veka Chief Secretary-in order a chhuahah chuan, Mizoram Home Guard-ah hian Director General post siam thar a nih thu a chuang a; Director General post chu Mizoram Police Service (MPS)-a super time scale-te awmna (post) tura tih a ni.

MRHG Association aiawhte ukil chuan, Director General grade pay chu Commandant General grade pay aia a san zawk thu High Court a hrilh a, "Director General hna chelh tur hian MPS ruat a, Commandant General dinhmun aia sang dah tum a ni. Hei hi Mizoram Home Guards Act, 1985 bawhchhiatna a ni," a ti a; chutih laiin, Director General hna chelh turin educational qualification siam a nih loh thu a tarlang.

Mizoram Home Guards Act, 1985 hnuaiah Director General post a awm loh thu sawiin MRHG Association-te ukil chuan, "Post siam tharah hian tumah ruat theih an ni lo, ruat an nih chuan 1985 Act bawhchhiatna a ni," a ti.

GHC, Aizawl Bench chuan, Mizoram Home Guards Act, 1985-ah hian MRHG chu Director General enkawlna hnuaiah a awm theih loh thu a tarlang a, "State sorkarin Commandant General aia thuneihna sang zawng neiin tumah Director General-ah a ruat thei lo," a ti a; Director General chu Commandant General aia dinhmun sanga dah a nih dawn chuan dan tihdanglam a ṭul thu a tarlang a ni.