Lungleiah total lockdown puan a ni

Lunglei, Champhai, Serchhip leh Khawzawl bawrhsapte chuan an district-a July 24, 2021 thlenga hman tur inkaihhruaina an tichhuak. Lunglei DC Kulothungan A chuan Lunglei khawpui chhungah total lockdown a puang.

Lunglei DC chuan Covid-19 hrilengin zual lam a pan zel avangin district mipuite fimkhur zual a ṭul takzet tih sawiin, "Mipuite himna tura tha thlah loa hmalatu VLTF-te, medical team-te, police-te, executive duty-te leh mimal tlawmngaite chungah lawmthu kan sawi a ni. Covid-19 do kawngah district administration leh sorkar department-te chuan theihtawp an chhuah chhunzawm zel dawn," a ti.

Lunglei CMO Dr LC Liana tarlan danin, an district-ah Covid-19 vei hmuhchhuah ni tin an pung mek zel a, July 16, 2021-a test 592 neih aṭangin Covid-19 positive hmuhchhuah thar mi 52 awmin, tun dinhmunah hripui vei enkawl mek mi 544 an awm.

Covid-19 vei enkawlna an neih CCC leh CCCC-te an khat tawh hle a, thawktute pawh an indaih lo a ni. Tun dinhmunah Serkawn Sikulpui chu mi 30 lenna tur CCC atan ruahmanna siam belh leh mek a ni.

Lunglei district-ah hian khum 22 awmna dedicated covid health centre (DCHC) pakhat, khum 400 awmna Covid care centre pariat leh khum 253 awmna community covid care centre 14 a awm a; July 1-16, 2021 chhung khan swab sample test 6,326 endik a ni a, Covid-19 vei mi 661 hmuh chhuah a ni.

Champhai, Serchhip leh Khawzawlah chuan total lockdown puang loin, an district bik atana inkaihhruaina tur an siam.