Serlui-B Hydro Electric Power-in Kawlphetha a siam chhuak rih lo
Serlui-B Hydro Electric Power (HEP) chuan tui tlêm avangin kawlphetha a siam chhuak thei rih lo. Hetih lai hian, Serlui HEP huam chhung, catchment area-ah lo/huan nei leh thing zai ṭhin an awm. Serlui-B HEP hi kawlphetha megawatt 12 pe chhuak thei a ni.
Vanglaini palaiin a kawmnaah Power & Electricity secretary H Lalengmawia chuan, Serlui-B HEP-ah tunlai hian tui a tlem avangin kawlphetha an siam thei rih lo tih a sawi a, "Tun hnaiah tui pût a awm angin thuthang a awm a, kumin July 9 khan YMA Sub-Hqrs, Kolasib leh PE department hotute nen kan enfiah tawh a, tui pût a awm lo. Tui erawh a tlem hle," a ti.
Serlui kam, HEP catchment area-ah huan/lo nei an awm thu sawiin H Lalengmawia chuan, "Min ṭháwng khawp mai. Tuikhuah aṭanga hmuh phak chiah si lo lui kamah huan/lo nei an awm tih kan hria a, hei hian nakin zela kawlphetha siam chhuahna kawngah nghawng ṭha lo tak a nei dawn a ni," a ti a; Kolasib DC hnenah hma la tura ngenna a thawn tawh thu a sawi.
H Lalengmawia chuan, "Hetianga huan/lo an neih hian zawi zawiin tuikhuah tana hlauhawm silt deposit (lui chhuata lei inhnawh khawm) a siam thei a, chu chuan HEP hman theih hun chhung tura duan a tihtawi phah thei a ni," a ti.
Health Secretary chuan, Serlui hnár lamah thing zai ṭhin an awm tih an hriat thu sawiin, "Lui hnár lam khuaa YMA-te aṭang pawhin thu kan dawng. A pawi kan ti tak zet a, hengahte hian hma kan lak vat a ngai a ni," a ti a; lui hnár leh kama thing leh mau tihchereu chuan kawlphetha siam chhuahna tura pawimawh tui a tihtlem phah theih thu a sawi.
Serlui-B HEP chu Mizoramin kawlphetha siam chhuah theihna a neih lian ber a nih mek thu sawiin H Lalengmawia chuan, "Kan ram ro hlu a ni a, tun aṭanga kan humhalh loh chuan nakin lawkah hman theih lohin a awm thuai dawn. Kawlphetha siam chhuahna tur project kan siam mekte pawh hi lui kam leh lui hnára thing leh maute tun aṭanga humhalh nacháng kan hriat a pawimawh tak zet a ni," a ti a; Mizoram tan a ni tih hriaa mipui ṭanrual a ngaih thu a sawi bawk.