Tlawva SHP enchhin thei ṭep Fur ruahtui tam hun an nghak

Tlawva Small Hydel Project (SHP) chu zawh fel thawkhat a ni tawh a, hnathawh dan enchhin turin a siamtu company mithiamte Mizoram an lo thleng tawh a, chutih rualin, SHP mamawh khawp tui a awm rih lo. He SHP hi kawlphetha megawatt 5 pe chhuak thei tura duan a ni.

Vanglaini palai zawhna chhangin Power & Electricity department hotute chuan, Tlawva SHP chu siam zawh ni tawh mah se, a hnathawh dan enchhin a ngaih thu an sawi a, "A siamtu Nortech Power Project, Kolkata aṭangin kar hmasa khan service engineer pathum leh general manager-te an lo chho tawh a, tunah hian Covid-19 inkaihhruaina angin project site-ah khung hran mek an ni. Tunkar tàwp lam hian an inkhung hun a zo ang a, test result a negative chuan enchhin hna an thawk ṭan ang," an ti.

PE department hotute chuan, Tlawva SHP chu hawn (commi­ssion) hun tur hriat theih a la nih loh thu leh megawatt 5 siam chhuak thei turin a mamawh khawp tui a la awm rih loh thu an sawi.

Tarlan tawh angin, South Khawbung RD block huam chhunga Tlawva lui aṭanga kawlphetha siamna tur, Tlawva SHP hi a taka hman theih turin nikum kum tawp lam khan peih a ni tawh a, tui a tam loh avangin a hnathawh theih dan enchhin theih a ni lo a, fûr ruahtui tam hun an nghak a ni.

PE department leh contractor inremna angin SHP hian chhum lo chat loa darkar 700 chhung megawatt 5 a pek theih hnuah chauh contractor-in kháwl chu department-ah a hlan ang.

Tlawva SHP hi cheng vbc. 73.40 hmangin Nortech Power Project, Kolkata-in an siam a, kawlphetha megawatt 2.50 siam thei kháwl pahnih vuah a ni a, khawl pahnih hmangin megawatt 5 a siam chhuak thei dawn a ni.