KHAWTHLIR

Kolasib MJA
Mizoram Journalists Association (MJA), Kolasib district chuan January 6, Inrinni khan Kolasib Press Club-ah Annual Conference an hmang a, Kolasib DRDA project director Lalnunhlua'n a hmanpui. Kolasib-a IPRO Collin Hlychho kaihhruaiin kum 2018-19 chhunga hruaitu thar an thlang a; president atan R Lalhmingthanga, vice president atan Vanlalauva leh treasurer atan C Zomuanpuia te an thlang a ni.

S.A Workshop
Salvation Army, India Eastern Territory hnuaia territorial headquarters staff-te chuan, Inrinni khan Aizawl Temple-a Booth Mansion Conference Hall-ah Staff Orientation Workshop an nei a, infuihtharna hun an hmang. Territorial commander, Com. Lalzamlova chuan, Territorial Headquarters-a thawkte chu hma lam pan tura theihtawp chhuah tur leh kum 2018-a territory thupui 'I hming zahawm rawh se' tih chu a hlawhtlin theih nan ṭan la turin a fuih a ni.

Thisen pe
Durtlang Branch KṬP chuan January 6, Inrinni khan Synod Hospital blood bank-ah thisen unit 30 an pe a, a petute mipa 26 leh hmeichhia pali an ni.

Assembly Secretary
Mizoram Legislative Assembly Secretariat-a additional secretary SR Zokhuma chu secretary-ah a kaisang a, January 3, 2018 aṭang khan a hna thar hi a zawm nghal.

TZP khawmpui
Tuipuiral Zirlai Pawl (TZP) chuan January 5 khan Khuangthing community hall-ah inkhawmpui an hmang a, bialtu MLA T Sangkunga'n a hmanpui. T Sangkunga chuan, zirlaite chu ram hmasawnna hrang hrang ngaihtuah ṭhin an nih rualin, zirna aṭanga hmasawnna ngaihtuah zual turin a chah. Inkhawmpuiah hian zirlai hlawhtling mi 97 hnenah chawimawina hlan a ni a, mi paruk hnenah special award hlan a ni.