NIT-Mizoram zirlaite an nuar mek
National Institute of Technology (NIT) - Mizoram zirlaite chuan an zirna-in leh an chenna hostel-ah harsatna tam tak an tawh avangin tun kar tir lam aṭang khan Chaltlang Dawrkawna NIT Administrative building kawtah lungawi lohna an lantir a; vawiinah pawh an la nuar chhunzawm zel dawn.
NIT-Mizoram zirlaite hian lungawi lohna an lantir avang hian ni thum chhung zirna an chhunzawm tawh lo a; an harsatnate chu chinfelsak thuai turin thuneitute an ngen. An harsatnate chu sorkarah leh zirlai pawlahte an thlen tawh niin an sawi.
NIT-in harsatna a tawh an tarlante
1. Thla khat vel kal ta aṭangin chawah harsatna a tâwk nasa zual. NIT dangte'n chaw man atan Rs. 80 an pek laiin, NIT-Mizoram zirlaite'n Rs. 147 an pe a, chuti chung chuan kan ei a chhe zawk hle; zirlai ṭhenkhatte hriselnain a tuar.
2. Primary school classroom tam tak aiin kan classroom a chhe zawk. Sound system, air conditioner, digital board, virtual classroom, etc. a awm mumal lo.
3. Institution-ah canteen kan nei lo a, classroom-ah chawchhun kan ei ṭhin.
4. Campus mumal kan la neih loh avangin institution building pangate leh hostel inkar a hla a, kal nan darkar 1:30 vel hman a ngaih avangin hun kan paih nasa hle. Ni khatah darkar 5 vel ṭul loah hun kan khawhral ṭhin. (Zing dar 7:30-ah hostel aṭangin an chhuak a, dar 9:00 velah class an thleng. Chawhma dar 9-12 chhung lecture a ni a, chhun dar 12 - chawhnu dar 2 chu hun âwl a ni. Chawhnu dar 2-5 chu laboratory-a awm hun a ni a, mahse, tlai dar 3 velah an titawp tlangpui.)
5. A hming chauhin library kan nei a, mi 10 lek lenna tâwk a ni. Lehkhabu a awm ṭha lo a, laboratory-ah hmanrua a awm
ṭha lo. Reading hall kan mamawh bawk.
6. Sport tihna tur khelmual kan nei lo. Hei hi NIT dinhmun leh nihna tur nen a inmil lo hle.
7. Classroom-ah aiin hostel-a kan dinhmun a chhe lehzual. Hostel chhe lutuk avangin dâwt kan sawi fo, kan nu leh pate kan hostel-a rawn kal lo turin kan hrilh ṭhin. Eng a ṭha tawk lo a, êng awm lohna toilet tam tak a awm a, toilet-ah inbual a ngai bawk.
8. Extra curricular activity tihna tur kan nei lo. NIT dangte chuan cultural club, innovation club, etc. te an nei a, keini'n kan nei ve thei lo. Extra curricular activity tihna tur hmun kan mamawh hle.
9. Hmunhma leh hmanraw ṭha lo vangin zirlaite tan mai bakah, zirtirtute tan harsatna tam tak a awm. NIT-a inzirtir dan a nih tur angin a ni thei lo.
10. NIT-Mizoramin hmunhma ṭha a neih loh avangin company ṭhate campus placement/recruitment ti turin an rawn kal ngai lo, campus placement tih hun laiin a ti turin NIT-Silchar pan a ngai ṭhin.
11. Ambulance kan nei lo a, hostel aṭangin damdawi-in a hla vek a, damloh thilah harsatna kan tâwk nasa.
12. Hostel-ah water filter leh cooler a awm lo a, kan tui dawn ang ang, inbualna leh toilet atana kan hman tho kan in ṭhin.