Lab. technician leh health worker Post ruak hnawhkhah loh a tam Mahni inpea thawk 145 an awm mek

Health & Family Welfare department-ah tun dinhmunah laboratory technician leh health worker post ruak hnawhkhah loh eng emaw zat a awm. Hetih lai hian, HFW department hnuaiah hian Covid-19 avangin laboratory technician leh health worker 145 chu mahni inpein, hlawh nei loin an thawk mek.

Vanglaini thu dawn danin, Health department hnuaiah hian laboratory techni­cian post 92 a awm a, chung zinga 59 chu hnawhkhah niin, hnawhkhah loh 59 a awm.

Hetih lai hian, Covid-19 a lèn hnuah HFW department hnuaiah hian mahni inpea thawk (volunteer) laboratory technician 109 an awm a, chung zinga pariat chu Zoram Medical College (ZMC)-a RT-PCR laboratory-ah an thawk a ni.

Health worker post 787 a awm thung a, post 471 hnawhkhah niin, hnawhkhah loh 316 a awm. Covid-19 léng avangin health worker 36 chu volunteer-in an thawk mek a, chu'ngte chu swab sample latu atan chhawr an ni ber.

HFW department hnuaiah hian micro­biologist post chu pathum awmin, a vaiin hnawhkhah vek a ni a; microbiologist pahnih chu Aizawlah awmin, pakhat chu Lungleiah a awm. Microbiologist post hi ZMC-ah paruk a awm a, post panga chu hnawhkhah a ni a, chungte chu - professor leh assistant professor pakhat ve ve leh demonstrator pathum an ni.

Covid-19 lèn hnua swab sample la tur leh sample endikna atana inpe hrim hrim chu mi 209 an awm mek a, chungte chu laboratory technician 109, health worker 36, data entry operator 43 leh driver 21 an ni.

Tun dinhmunah ZMC RT-PCR laboratory-ah thawktu mi 45 an awm mek a, team A leh B-ah an inṭhen a ni. RT-PCR laboratory-a thawktu mi 45 zinga mi 31 chu regular/ contract an ni a, mi 14 chu volunteer an ni thung.