Mizoram chhunga khaw 261-ah Fall Armyworm hmuh a ni tawh

Vaimim ei chhetu pangang chi khat, Fall Armyworm (FAW) chu Mizoram hmun hrang hrangah a puang mek a, hriat theih chinah Mizorama khaw 261-ah hmuh a ni tawh.

Vanglaini palaiin Agriculture department hnen aṭanga thu a dawn danin, FAW hi kum 2019 khan Mizorama vaimim chìnna hmun hrang hrangah hmuh ṭan a ni a, kumin hi Mizorama vawi thum a puanna a ni.

Agriculture department-in nimin thlenga report an dawn danin, FAW hi Mizorama district zawng zawngah hmuh a ni a, ram hectare 1,318-a zaua chhungkaw 6,834-te vaimim chìnnaah hmuh a ni.

Agriculture hotute chuan, kum 2019-a FAW a puan ṭan lai aiin tunah chuan invèn dan leh buaipui dan an thiam tawh tih an sawi a, "Africa leh ram ṭhenkhatte angin Mizote'n vaimim hi chaw pui berah kan hmang lo a, chu­vangin, kum 2019-ah vaimim eng emaw zat tichhe mah se, ṭàm phah kan awm lo. Tunah pawh a vawi thum lanna a ni tawh a, department leh loneitute lam pawhin a buaipui dan kan thiam tawh hle," an ti.

Loneitute tan damdawi chi hrang panga an pek thu sawiin, "Nikum leh kum hmasa lamah kan tawn tawh avangin department chuan damdawi dah khâwl sa kan nei nual a, inkhàrkhip lai pawhin mamawhtute hnenah kan sem chhuak reng. Heng damdawi bakah hian sahbawn sen tui a ṭha tih kan hre tawh a, sahbawn sen tui kan hmantir nasa bawk," an ti a; loneitute'n an lo hmelhriat tawh avangin FAW-in vaimim seng tur awm lo khawpa chhiatna nasa a thlen an rin loh thu an sawi.

Agriculture department hotute chuan, FAW thahna damdawite chu a hman dan tur ang taka hman a pawimawh thu sawiin, "FAW hi vaimim zîk chhungah an awm ṭhin a, dam­dawi emaw, sahbawn sen tui emaw chu vaimim zîkah far/leih mai a tâwk. Vaimim kûng leh a velte damdawi hmanga phuhin awmzia a nei lo," an ti.

FAW thahna hmanga vaimim leih/ phuhte chu ni 7-10 (waiting period) hnuah mihring tan a him thu sawiin Agriculture hotute chuan, "Ni 7-10 hnuah chuan damdawite chu leiah (bio-degradable) a lut thla vek a, he waiting period hi loneitute'n an hriat a pawimawh," an ti a; damdawi pek aṭanga waiting period hnuah chauh seng tur a nih thu leh damdawi hman dan tura inkaihhruainate hriat chian a pawimawh thu an sawi bawk.