ASF vangin vawk 7,080 thi tawh

Mizoramah vawk pùl hri African Swine Fever (ASF)-in kiam lam a la pan thei lo a, nimin thleng khan Mizorama khua/veng 112 chu ASF infected area-ah puan tawh niin, chu'ng hmunahte chuan ASF vangin vawk 7,080 a thi tawh.

March 21, 2021 aṭangin Lunglei district-a Lungsen khuaah chhan hriat loh leh thih dan pangngai loin vawk a thi ṭan a, April 15, 2021-ah ASF vanga thi a ni tih finfiah a ni. March 21 aṭanga nimin thleng khan Mizorama district 11 zinga district pakuaa khua/veng 112-ah ASF a leng tih finfiah tawh a ni.

ASF hi Aizawl district-ah a darh nasa ber a, chutih rualin, Lunglei district-ah ASF vanga vawk thi a tam ber thung. Saitual leh Kolasib district-ah ASF infected area puan la awm lo mah se, nimin thleng khan chhan hriat lohin Saitual district-a khua/veng pariatah vawk 46 leh Kolasib district-a khua/veng pahnihah vawk pahnih a thi tawh.

Animal Husbandry & Veterinary department chhinchhiah danin, Mizorama ASF infected area puan tawhna district pakuaa khua/veng 112-ah vawk 44,383 vulh a ni a, chu'ng zinga 7,080 chu ASF vangin a thi tawh a, vawk dam 37,220 a la awm.

ASF infected area-a puan loh district 11-a khua/veng 83-ah nimin thleng khan chhan hriat lohin vawk 374 a thi tawh bawk.