HSSLC 2021-ah zirlai 10,089 an pass

Mizoram Board of School Edu-cation (MBSE) chuan nimin khan Higher Secondary School Leaving Certificate (HSSLC) Examination 2021 result a tichhuak a, zirlai exam 11,491 zinga 10,089 an pass a, pass percentage chu 87.80 niin, nikum aiin 9.28-in a sang zawk.

Kumin HSSLC Examination-ah hian exam hmachhawntu zirlai 11,491-te chu regular student 11,350 leh private candidate 141 an ni a; regular-a exam zingah 10,029 (88.36%) pass in, private candidate zinga 60 (42.55%) an pass. Pass zawng zawng zirlai 10,089 zingah hmeichhia tam zawkin, 5,328 an ni a, mi 4,761 chu mipa an ni.

Zirlai pass 10,089 zinga 1,078 chu distinction-ah an pass a, nikumah mi 431 an pass. First division-ah 4,560 (nikumah 2,806), second division-ah 3,605 (nikumah 4,049) leh third division-ah 846 (nikumah 2,391) an pass. Compartmental chance nei zirlai 143 (nikumah 96) an awm a; zirlai 2,551 (nikumah 1,259) an fail thung.

Zirlai pass vekna sikul Arts-ah 69 (nikumah 29), Science-ah paruk (nikumah pakhat) leh Commerce-ah 10 (nikumah pariat) a awm. Chutih laiin, zirlai fail vekna sikul Science-ah pakhat a awm a, Arts leh Commerce-ah fail vekna sikul a awm lo.

Arts stream bikah zirlai exam 8,622 (nikumah 9,470) zinga 7,520 (87.22%) an pass a, nikumah 7,377 (77.90%) a ni a, mi 980 (nikumah 2,016) fail-in, compartmental chance nei 122 an awm. Distinction-ah mi 792 (nikumah 258), first division-ah 3,011 (nikumah 1,750), second division-ah 2,917 (nikumah 3,092) leh third division-ah 800 (nikumah 2,277) an pass.

Science-ah zirlai exam 2,299 (nikumah 2,267) zinga 2,052 (89.26%) an pass a, nikumah 1,800 (79.40%) a a ni thung a; zirlai 230 (nikumah 448) fail-in, compartmental chance nei mi 17 an awm. Distinction-ah mi 211 (nikumah 117), first division-ah 1,311 (nikumah 880), second division-ah 507 (nikumah 754) leh third division-ah 23 (nikumah 49) an pass a ni.

Commerce-ah zirlai 570 (nikumah 587) zinga 517 (90.70%) an pass a, zirlai 49 an fail a, nikumah pass percentage 85.18 a ni. Distinction-ah zirlai 75 (nikumah 55), first division-ah 238 (nikumah 175), second division-ah 181 (nikumah 202) leh third division-ah 23 (nikumah 68) an pass.

HSSLC Examinations 2021-ah hian Arts stream-ah sorkar sikulah 78.47%, deficit school-ah 94.48%, aided school-ah 92.36%, lumpsum school-ah 88.37% leh private school-ah 91.26% an pass a; private candidate zinga 42.97% an pass bawk.

Science-ah chuan sorkar sikulah 76.72%, deficit school-ah 94.35%, aided school-ah 94.12% leh private school-ah 92.27% an pass a; private candidate zinga 45.45% an pass. Commerce-ah chuan sorkar sikulah 78.29%, deficit school-ah 94.16%, private school-ah 96.56% an pass a ni.