Tuivai Zaua thing zai rûknaa inrawlhah Mizoram Assembly Speaker an puh

Tuivai Zau Bamboo Society (TZBS) chuan nimin khan thu­chhuah siamin, Chalfilh constituency huam chhunga Tuivai Zau Bamboo Society ram chhunga thing ṭha tak takte chu bialtu MLA Lalrinliana Sailo, Assembly speaker hriatpuinain mi ṭhenkhatin nasa takin an zai rû niin an tarlang.

TZBS chuan, Society ramah ngaw ṭha tak awmin, thingzai tur ṭha tak tak a awm ṭhin tih tarlangin, "Ram ngaw chhunga thingte chu Luangpawn mi ṭhenkhatin an zai ru ṭhin a, khap tuma hmalakna a awmin bialtu MLA, Speaker hmachhuanin an tilui zel a ni," an ti.

Thing zai rûk chungchang chu March 2020-ah police-ah report a ni a, police-in thingzai cubic 700 an man thu tarlangin TZBS chuan, "Amaherawhchu, thing zaitute hian Speaker an phone a, Speaker-in a thuneihna hmanga hotu sang lama hma a lo lak avangin an thing zai sate chu an la kîr leh vek a ni," an ti a; Forest department leh Police lamin eng mah an ti zawm thei lo a, thing pawh an zai chhunzawm leh nghal niin an tarlang.

Society tarlan danin, Tuivai Zau Bamboo Society ram chu LSC 13 hmanga siam a ni a, society member-ah hian Keifang, Phullen, Luangpawn leh Phuaibuang khaw mi 150 zet an awm.

Society ram chung­changah March 14, 2003 khan Sub-District Council Court, Aizawl district-in thutlukna a siam a, LSC-te chu dan ang thlapa pek a nih avangin ram neitute chu an ram chungchangah an duh ang anga hma la thei turin thuneihna a pe tawh a, mi dangin an tibuai tur a ni lo, tiin thutlukna a siam tawh a ni.

TZBS chuan, "Court thutlukna zahawm tak pawh zah zo loa Speaker hoa hmalakna a awm hi a pawi kan ti tak zet. Hetiang hmalakna hi tàwp nghal se kan duh a, an tàwp nghal a nih loh chuan a ṭul dan ang anga hmalak kan tum a ni," an ti.