Hand sanitiser chi khat 'Sparash' a him lo

Health Services joint director (Food & Drugs Administration) Lalsawma chuan thuchhuah siamin, Covid-19 laka invênna tura kut tihfaina (hand sanitiser) chi khat 'Sparash' (Batch no. 9336, 9337 leh 9338) chu a him tawk loh thu a tarlang a; chutiang kawlte chu FDA hnenah an kawl zat hriattir turin a ngen.

Lalsawma chuan, India ramah hand sanitiser lem (spurious/sub-standard) a darh nasat thu tarlangin, "Product ṭha lo dap chhuah hna hi Mizoram FDA chuan a thawk reng a, hmuh chhuah pawh eng emaw zat kan nei tawh," a ti.

Sparash chu tun hnaiah mi ṭhenkhatin Guwahati aṭangin online-a an chah chhuah thu sawiin Lalsawma chuan, "Sparash hi Mizoram hmun hrang hrangah a darh nasa hle a, a chah chhuaktute aṭangin eng emaw zat kan hmu chhuak tawh. Purabi Pharma Lab Narengi, Guwahati-a mite siam a ni a, Mizoramah ml. 500 leh litre 5 chi hmuh a ni," a ti a; danin a phût anga label siam a nih loh thu leh chutiang chu zawrh khap tlat a nih thu a tarlang.

Lalsawma chuan, Assam State Drug Controller hnenah thil awm dan enfiah tura an ngen thu sawiin, "Anni'n rang takin hma an la nghal. A siamtute pawhin thil dik lo a awm tih an pawm a, an hralh chhuah tawh zawng zawng lak kîr nghal an remti. Ni sarih chhungin Assam State Drug Controller hnenah recall dinhmun kan report dawn a ni," a ti.

Joint Director (FDA) tarlan ṭhenkhat
1. Thil siam chhuah reng reng lâk lêt (recall) a ngaih chuan thil fel tâwk lo a awm tihna a ni.

2. Sparash hi mahni hman atana kawlte pawhin hman loh a him ber.

3. WHO-in Coronavirus laka kut silfaina atana a pawm chu 80% Ethyl Alcohol emaw, 75% Isopropyl Alcohol emaw a ni.

4. Hand sanitiser hman tur thlanah mi tin fimkhur a ngai.