CS-in sumdawng hruaitute a kâwm Sumdawngte'n dawr hawn chhâwk an duh
Chief secretary Lalnunmawia Chuaungo chuan nimin khan CS conference hall-ah sumdawng páwl inzawmkhawm, Mizoram Bussiness Coordination Committee (MBCC) hruaitute a kâwm. MBCC chuan, total lockdown a zawh hunah hun bituk neia dawr inhawn chhâwk an duh thu an thlen.
Vanglaini thu dawn danin, MBCC hruaitute chuan hun rei tak dawr hawn theih a nih tawh loh avangin harsatna an tawh thu an sawi a, Chief Secretary hnenah hian total lockdown kal mek June 7, 2021-a a tàwp hunah chuan dawrte chu an thil zawrh azirin darkar bituk siama inhawn chhawk tawh an duh thu an thlen a ni.
MBCC hruaitute chuan, Covid-19 an hlauh loh vang ni loin, dawr hawn an mamawh tawh avangin inhawn chhâwk ni se an duh thu an sawi a, "Dawr kan hawn rei loh avangin kan bungruate pawh a chhe zo dawn a, heng en felna atan ringawt pawh hian dawr hawn kan mamawh. Inhralh loh piah lamah kan bungruate a chhe zo thei dawn a ni," an ti.
Sumdawng zingah loan laa sumdawnna kalpui an tam thu sawiin MBCC hruaitute chuan, loan chu a pung (interest) tihhniam emaw ngaihhnathiamna emaw Mizoram sorkarin Reserve Bank of India hnenah dilsak se an duh thu CS hnenah an thlen.
Inkhuahkhirh leh inkharkhip avanga hun rei tak chhung dawr an hawn tawh loh avangin, chhiahah pawh sorkarin ngaihhnathiamna chin nei se an duh thu an thlen bawk.
Sumdawngte'n dawr hawn loh rei avanga an harsatna tawh an sawi dang chu, thawktu hlawh pek leh dawr leh kudam luah man pek chungchang a ni.
MBCC hian May 26, 2021 khan Chief Secretary hnenah lehkha thawnin, inkhuahkhirh leh inkharkhip vanga harsatna an tawhte an thlen a, ruahmanna siamsak turin an ngen a ni.
