Lunglei thlabârna sorkarin pawi a ti

Environment, Forest & Climate Change (EFCC) minister TJ Lalnuntluanga chuan nimin khan Lunglei DC conference hall-ah sorkar official, BSF, Assam Rifles, YMA leh VC hruaitute a kâwm a; kângmei vanga thlabár taka Lunglei mipui an awm chu sorkarin pawi a tih thu a sawi.

EFCC Minister chuan, kângmei ṭhelh hna sorkar tih tura dah mai loa mi tlawmngai leh ṭhahnemngai tak tak pên chhuakte chungah sorkar aiawhin lawmthu a sawi a, "Sorkar hotute'n theihtawp an chhuah a, fire tender leh thawktute Aizawl aṭanga an rawn thawn belh bakah, IAF hnenah thlenin, Prime Minister pawhin vawiinah phone-in Chief Minister a bia a, a ṭul anga puih a inhuam thu a sawi a ni," a ti.

Amah ngawtin ram a kâng lo tlangpui tih sawiin TJ Lalnuntluanga chuan, "Tikângtu an awm ṭhin. Thing leh maute ṭul lo taka kan suat hian kan ram a tiro a, tui hna tam tak a chhu chat a, tuna kan buaina leh harsatna lian ber chu khaw ṭhál leh tui harsatna a ni ta," a ti a; thing leh mau leh nungchate humhalh kawngah ṭan lak nasat lehzual a ṭul thu a sawi.