Auba leh Lacazette inlan dawn lo

Zanin dar 12:30 hian Emirates Stadium-ah Arsenal chuan Everton an lo mikhual dawn a, Gunners hian an striker ṭha pahnih Pierre-Emerick Aubameyang leh Alexandre Lacazette te chu an chhawr thei dawn lo.

Auba hian ram tana a feh chhuahna lamah malaria a kai a, enkawl mek a la ni. Fulham nen an inhnehtawk ṭuma hliam tuar Lacazette pawh inkhel turin a la inpeih tawk lo bawk - Mikel Arteta tan tlarhma lamah player siksawi a ngai ang.

Arsenal chuan thu chhuah siamin, "Lacazette chu a malpui vei lam hliam vangin a chawlh a la ngai dawn. Auba dinhmun a ṭha zel a, inkhel thei erawh a la ni lo. Tun kar tawpah chuan training zangkai zawk chu a nei thei tawh ang," an ti.

Tun thla tir lama kerek hliam Martin Odegaard erawhin training a zawm pangngai tawh. Real Madrid aṭanga loan hmanga an hawh hian Toffees a hmachhawn theih tawh a rinawm a, defender Kieran Tierney leh David Luiz te erawh an chawlh a la ngai dawn.

Arsenal leh Everton hi Premier League table laihawl a awm niin, match khata khel tlem chungin Carlo Ancelotti naute an chungnung zawk. North London club tan mualpho lutuk tur hliah khuh ṭhen nan an elpui team hneh a pawimawh ang.