MR bill dik lo hmuchhuakte hnungah Health Minister-in din zel a intiam

Mizoram Government Pharmacist's Association (MGPA) chuan nimin khan I&PR conference hall-ah General Conference an hmang a; khuallian, Health minister Lal Thanzara chuan, pharmacist-te chu medical reimbursement (MR) bill dik lo hai chhuah kawngah huaisen taka kal turin a fuih a, harsatna an tawh chuan an hnunga din a intiam.

MGPA hruaitute'n MR bill dik lo, damdawia inenkawlna nena inmil lo an hmuh chhuah ṭhin thu an sawi chungchangah Lal Thanzara chuan, "MR bill dik lo in hmuhchhuah hian Mizoram sum tam tak luangral tur min humsak a ni. Huaisen takin bill dik lo zawn chhuah hna hi thawk zel ula, harsatna in tawh chuan in hnungah ka ding zel ang," a ti.

Health Minister chuan, Health department chu sorkar anga hmai balh theihna, beih remchang ber department a ni tih sawiin, Health department-a thawktu hrang hrangte chu fimkhur tak leh zaidawh taka anmahni dawrtute dawngsawng ṭhin turin a chah.

Health department-in tun hnaiah hmingchhiatna chi hrang hrang an nei tih sawiin, Lal Thanzara chuan, "Nimina ka zin haw a, nurse duty pakhatin a drip khai a tihchak lutuk vanga nunna chán an awm nia report ka hmu a, a pawi ka ti hle. Kan nurse-te hi an hahin an rim hle a, mahse, insûmtheihna leh dawhtheihna nena hna thawh hram hram a ṭul a ni," a ti.

Mizo mipuite hriselna a ṭhat zawk theih nan Health department-a thawktute an pawimawh vek tih sawiin, Lal Thanzara chuan, "Tumah ṭangkai bik an awm lo. Mahni hna ṭheuh ṭha taka kan thawh chuan mipuite'n hriselna ṭha an nei thei dawn a ni," a ti a; ram changkang ni tur chuan a chhunga chengte an hrisel a ngaih thu a sawi.

Health Minister sawi danin, Aizawl Civil Hospital-ah damdawi man tlawm zawk zawrhna (Generic Drugs Store) siam turin Health department-in hma a la mek a, damdawi zawrh tur thlang turin specialist-te tih an ni. Specialist-te'n damdawi zawrh tur an thlan hunah cheng nuai 12 man vel damdawi zawrh chhuah a ni ang.

MGPA coneference hi an pawl vice president Lalvuana'n a kaihruai a, chawhnu lamah ro an rel. An thu ngaihtuah zingah - Drugs Testing Laboratory tihpuitlin a nih theih nana hmalak te, Generic Drugs Store tihpuitlin a nih thuai theihna atan hmalakte leh Mizoram State Pharmacy Council Rules, 1997 chungchangte an tel.


Share this Post

Login to comment
No Comments