Jazz leh Rockets dinhmun a inthlau

Nimin zing NBA regular season inkhelah Utah Jazz chuan an khingpui Houston Rockets chu 112-89 in an hneh. Jazz hi Western Conference hmahruaitu an ni a, chak lo Rockets erawh table mawngphah luahtu an ni thung.

Jazz hian season duhawm an hmang mek a, vawi 44 an chakna tawng tur hian Jordan Clarkson (22 points), Joe Ingles (21), Rudy Gobert (19) te an khel ṭha vek a, player dang pathumin point 10 chuang an neih bawk avangin nuamsa takin hnehna an chang.

Season tir lamah khan James Harden chuan Rockets hi a chhuahsan. Harden hian a chhuah chhan khan club lian dang elphak tura an ṭhat tawk loh bakah, club chuan hmasawnna lam a hawi loh vang niin a sawi.

Hun a kal zel a, player ṭha Harden thusawi a dikzia a lang chho zel. Rockets hi vawi 44 zet an tlawm tawh a, vawi 15 chauh an la chak - conference pahnih en tawn pawhin NBA team zinga chak tlem ber an ni hial.