An ramah Djokovic a chak

Novak Djokovic-a'n Monte-Carlo Masters-ah beisei a phak lo a, an ramah inelna a hmachhawn chhunzawm nghal. Nilaini zan khan Serbia Open-ah Djokovic hian a match hmasa berah Soonwoo Kwon chu 6-1, 6-3 in a hneh.

World number 1 hian hnehna chang turin harsatna a tawk lo. Darkar khat leh minute riat chhung lekin South Korean player hi a hneh a, a khingpui service hi vawi nga ngawt chhuhsakin a service vawi khat a hloh ve thung.

Grand Slam vawi 18 champion tawh Djokovic hian a match lehpekah chuan Miomir Kecmanovic a hmachhawn leh dawn. Novak ang bawka Serbian player Kecmanovic-a'n inkhel dangah Arthur Rinderknech chu 6-3, 3-6, 6-3 in a lo hneh ve bawk.

Kum 33 mi Djokovic chuan, "Eng inelna mai pawh hi awlsam a awm lo. Player thar an rawn chhuak zel a, anni hneh tur chuan kan khelh dan phung pawh siamrem ve zel a ngai. Tunlai mila tennis khelh theih a pawimawh," a ti.