Baristow-a'n Sunrisers a chakpui

Jonny Bairstow-a'n thi loin run 63 a siam a, Sunrisers Hyderabad-in IPL 2021-ah a vawi khat nan hnehna an chang. Nilaini zan khan Sunrisers hian Punjab Kings wicket kuain an hneh.

Nilaini zan inkhel pakhat zawkah Chennai Supers Kings-in run 220 zetin siamin Kolkata Knight Riders chu run 18-in an hneh ve bawk. Zanin dar 7:30 hian Punjab Kings leh Mumbai Indians te MA Chidambaram Stadium-ah an inkhel ve leh ang.

Bairstow a che ṭha
MA Chidambaram Stadium, Chennai-a inkhelah Punjab Kings-in vuak hmasak an thlang a, an tifuh lo. Punjab hi over 19.4-ah run 120 chauh siamin an thi vek a, run siam tam pahnih Sharukh Khan leh Mayank Agarwal ten run 22 ve ve chauh an siam.

Sunrisers bowler-te an che ṭha tlang a, wicket thum laa run 21 petu Khaleel Ahmed-a'n wicket a la hnem ber. Sunrisers tan hna harsa a awm tawh lo a, Jonny Bairstow-a'n thi loin run 63 a siam a, bul a ṭanpui captain David Warner-a'n run 37 a siam ve bawk. Over 18.4-ah Sunrisers-in wicket khat chauh hlohin run 121 an siam a, wicket kuain an chak.

Chennai chakna Du Plessis
Wankhede Stadium-ah Kolkata Knight Riders-in vawm hmasak an thlang a, Chennai batsman-te an thiam thil lantirna hun an siamah a ngaiah a ngaih theih. Opener pahnih Ruturaj Gaikwad (64) leh Faf du Plessis (95*) te an che ṭhat Chennai dinhmun a ṭha nghal.

Over 20 a zawh meuh chuan run 220 tehmeuh an siam a, chak turin an dinhmun a ṭha hle. Knight Riders bul ṭantute an che chhia a, run siam an harsat. Amahrawhchu, Dinesh Karthik (40), Andre Russell (54) leh Pat Cummins (66*) te zarah over 19.1-ah run 202 siamin mawi hnai takin an chak lo. Kolkata batsman-te hi thi fai vek mah se over tawp lamah Chennai an ti hlauthawng hman hle.