Disaster Management & Rehabilitation (DMR) department chuan nimin khan a ṭum hnihna atan 5th IR battalion headquarters, Lungverhah YMA volunteer-te tan chhiatna hmachhawn danzirna an buatsaih a, DMR secretary PC Lallawmsanga'n a hawng.

PC Lallawmsanga chuan, chhiatna a thlenin YMA member-te an pawimawh tih a sawi a, "State Disaster Response Force aṭangin training chhuak nei nual tawh mah ila, YMA member-te hi chhiat tawhna hmun a thleng hmasa leh ṭangkai ber an ni," a ti. Training-a telte chu thiamna tak tak nei a, mi dang zirtir chhawng thei tura zir turin a chah.

Central YMA treasurer J Lalsailova chuan, disaster management training chungchang chu YMA General Conference-ah an lo rel tawh thu sawiin, "Training hi thla khat dawn lai mahni pawisa séng lo a, sorkarin a buatsaih hi a lawmawm hle a ni," a ti.

Training-ah hian hmun hrang hrang aṭangin YMA member 57 an tel a ni.

Share this Post