Man City-in champion an hnaih zel

Manchester City chuan Nilaini zan khan Villa Park-ah mualneitu Aston Villa 2-1 in an hneh. Pep Guardiola hote hi Premier League-a pahnihna Manchester United aiin point 11 an sang a, champion chiang turin match nga aṭangin point riat bak an mamawh tawh lo.

Aston Villa hian second 20-na lekah John McGinn hmangin hma an hruai a, first half-ah Man City-in Phil Foden leh Rodri goal hmangin an lehthal. Amaherawhchu City defender John Stones chu first tawp hmain hnawhchhuah a ni a, player 10-a khel Man City hlauthawng hman mah se minute 57-naah Matty Cash hnawhchhuah a nih ve avangin Villa-in a tamna an hmang ṭangkai thei lo a, player 10 ve vein a tawp an khar.

A goal hma
Man City defender John Stones-a'n kuminah harhtharna a chang a, Pep Guardiola hnuaiah hmun pawimawh chang chho mah se Villa lakah erawh chet fuh a harsat. Inkhelh ṭan chiahah Tyrone Mings-a ball vawrh luh chu Stones hian a tlawh ṭhelh a, Ollie Watkins-a'n ball hi changin a cross ball chu John McGinn-a'n second 20-na lekah a ti goal.

Mikhual team-in bul ṭan ṭha lo mah se Pep Guardiola-a'n hnehna chan ngei duhin player a thlang a, tun hnaia che ṭha Phil Foden, Riyad Mahrez, Bernardo Silva leh Ilkay Gundogan te hoin bul an ṭan miau avangin insiamṭhat an harsat lo. Hetihlai hian FA Cup semifinal-a beisei pha lo - Raheem Sterling leh Ferran Torres te erawh bench-ah dah an ni a, khelmualah an inlan lo ve ve.

Minute 22-naah Foden a rawn lang a, English rawlthar hian mual sira awm Mahrez a pass a, anni hian Silva a pe leh. Portuguese midfielder cross chu Foden bawkin a chang a, ṭha zetin goal hmahruai a khung. Minute 40-naah Bernardo Silva cross chu Rodri-a'n a tauh goal a, Man City-in 2-1 in hma an hruai ta zawk.

Red card 2
Man City nuamsa taka chak tura ngaih theih an nih laiin minute 44-naah John Stones-a'n Jacob Ramsey khup a tlawh fuh a, VAR hman hnuin referee Peter Banks-a'n English defender hi red card a pe. Stones hian ṭul lo taka red card a hmuh avangin Tottenham Hotspur nen Carabao Cup final an khelh hunah a inlan ve thei dawn lo.

Aston Villa-in player 10-a khel lakah minute 45 khelh tur an neih avangin point hlawh chhuak turin an dinhmun a ṭhaah a ngaih theih a, amaherawhchu Jack Grealish a tel lohna Villa tlarhma a hriam tawk lo. Minute 57-na lekah Matty Cash-a'n ṭul lo takin Foden a tlawh thlu a, yellow card vawi hnihna hmuin player 10-in an kheh ve a ṭul phah.

Eng nge an sawi?
Manchester City manager Pep Guardiola chuan, "Foden hian hma a sawn zel. Kan team tan hian a ṭangkai takzet a, player pawimawh ber zinga mi a ni ta. Goal hmaa a hlauhawmna hi a danglam bikna a ni," tiin a sawi.

Guardiola chuan sawi chhunzawmin, "Kan bul ṭan dan a fuh lo a, mah se kan insiamṭha viauin ka hria. Ball tel leh tel loin kan khel ṭha a, a tlem zawk kan nih lai pawh khan kan khel ṭha a ni," tiin chak an phu thu a sawi.