Harsa takin Nadal a chak

Rafael Nadal-a'n clay court chungah pawh duhthusamin tennis a la khel thei rih lo. Spanish star hian Nilaini zan khan Barcelona Open khelin, set hmasa a hloh zet hnuah Ilya Ivashka chu 3-6, 6-2, 6-4 in a hneh hram.

Nadal hian 2004 aṭanga chhiar ṭan chuan, clay court-ah bik world ranking 100 hnuai lam ngam loh a nei ngai lo. Tun ṭuma a khingpui Ivashka hi world number 111 a ni a, set hmasa berah erawh world number 3 hian game thum chauh a la.

Set hnihna aṭangin Nadal a tho chhuak a, a inkhelh thiamna hmunah hian huaisen takin a tho chhuak. Barcelona Open bikah Nadal hi vawi 62 a chak tling ta chiah a, ṭum li chauh tlawm a la nei - vawi 11 lai nomawi a chawi tawh a ni.

Grand Slam vawi 20 champion tawh Nadal hian nizan khan Kei Nishikori a hmachhawn leh a, result kan hre hman lo. Japanese tlangval hian 2014 leh 2015 khan Barcelona Open title hi a lo la tawh, sulhnu nei ṭha ve tho a ni bawk.

Inkhel dangah Fabio Fognini chu Bernabe Zapata Miralles lakah 6-0, 4-4 in chungnung mah se chak loa puan a ni. Line judge-in umpire hnenah Fognini hian ṭawngkam mawi lo tak a hmang tih a sawi a, hei vang hian chak loah an puang.

A tlak danah Fognini a lawm lo hle. Fognini chuan, "Ka chhui chiang dawn, ka chunga thil thleng hi thutlukna dik lo tak a ni, kei chuan tournament aṭanga inpaihna tur khawp ṭawngkam ka hman ka hre lo," tiin a sawi.

Monte Carlo Masters lama che fuh tak Dan Evans pawh a che fuh chhunzawm lo. Britain number 1 hi French player Corentin Moutet lakah 6-4, 5-7, 6-3 in a chak lo.