Tuirial HEP tuikhuahin a tihchhiat chhunga ram neite an lungawi lo

Tuirial HEP Effected Land Owners Association (THEPELOA) chuan nimin khan thuchhuah siamin, Tuirial Hydro Electric Power siamnaa zangnadawmna pek chungchangah, tun thlenga thu lawmawm an la hriat loh avangin an lungawi loh thu an tarlang.

THEPELOA secretary Thangchina hminga thuchhuah chuan, Tuirial HEP-in Tuirial kama huan lo ram nei a tihchhiatte High Court order-in finfiah tura a tih angin Mizoram sorkarin a enpui zo vek tawh niin a tarlang a, "Hun a kal tam leh deuh tawh chungin awmzia a nei lo nge, tun thlenga chanchin ṭha leh thu lawmawm hriat a la ni lo hi kan lungawi thei tawh lo a ni," a ti.

Tuirial kama huan lo ram neite chuan an phuahchawp ve lo nia sawiin THEPELOA chuan, "Kan pi leh pute hun laia kan eizawnna ber, kan thlai tharte phai lam sumdawngte nena indawr tawna eizawnna bera kan hman ṭhin heti maia Tuirial HEP-in min tihchhiatsak man hi kan tél tur a ni," an ti a; chu chu an dikna chanvo a nih thu an sawi.

THEPELOA chuan, kum 24 chhung an eibar zawnna tihchhiat a nih hnu pawha zang­nadawmna tun thlenga sorkar leh a buaipuitu NEEPCO-in an la pe lo chu ná an tih thu an sawi a, "Zangnadawmna min pe thuai turin Mizoram sorkar kan phût tak meuh. Kan huan lo ram tihchhiat man kan hmuh dawn loh ai chuan a theih ang anga hmalak kan tum a ni," an ti.