Aizawlah QF leh CCC siam belh an rél

Aizawl bawrhsap Dr Lalhriatzuali Ralte hoin April 20, Thawhlehni khan DC conference hall-ah Aizawl district-a Covid-19 do kawnga hmalakna leh hmalak dan turte sawiho a ni a; quarantine facility leh Covid care centre (CCC) siam belh an rél.

Bawrhsap chuan, Aizawl district-ah hripui vei an pun chak thu sawiin, "District administration pawhin theihtawp a chhuah mek a, ramri hrûl aṭanga lui kâna rawn lut zawng zawngte pawh hri an vei leh vei loh endik vek a nih theih nan hmalak tum a ni," a ti a; local task force (LTF)-te inpekna fakawm a tih thu leh Covid vaccine kalpui meka vaccine lakna thlengtu local council leh YMA-te inphalna lawmawm a tih thu a sawi.

Ṭhutkhawmah hian, Covid-19 dona tura inkhuahkhirhnaa hmalak mek chungchang te, quarantine centre/facility, Covid care centre, vaccine kalpui mek leh swab sample lâk chungchangte an sawiho. Hripui vei hmuh belh zel a nih avangin tun hmaa CCC hman ṭhinte chu tharthawh leh a, a hma aia tam zawk siam belh an rél a ni.

Ni sarih chhung inkhung hrang tling tawhte'n swab sample endiktir tura anmahni kal chhuaka RT-PCR laboratory awmna ZMC an pan kher ngai loa an awmnaa sample lak an remti a; thawktute remchan dan angin ni 7-10 inkarah home quarantine-a awmte swab sample lâk ṭhin turin an rél.

Ṭhutkhawma tel doctor-te chuan, CCC leh quarantine facility-a bawlhhlawhte chu darkar 72 a awm tawh chuan Covid-19 hrik a thi tawh a, bawlhhlawh dang nen ang khat vek a nih tawh thu an sawi a; inkaihruainaa awm sa angin bawlhhlawhte chu centre bul hnai remchang laiah lei laih khuara phûm theih a nih thu an sawi bawk.

Meeting-ah hian Aizawl East leh West district-a chief medical officer leh district immunization officer te, Integrated Disease Surveillance Project (IDSP) hotu te, Police leh AMC hotute leh incident commander-te an tel a ni.