Sorkarin Mizoram Liqour (Prohibition) Rules a la peih lo
Mizoram Liqour (Prohibition) Rules (MLP Rules) chu peih a la ni lo a, peih thuai beisei a ni. Rules ennawn tura Council of Minister-in a din deputy chief minister Tawnluia kaihhruai committee chu ṭum khat an ṭhukhawm tawh.
MLP Rules hi 'by notification' hmanga tihchhuaha hman tum a ni a; mahse, December 29, 2020-a chief minister Zoramthanga hoa Cabinet meeting chuan ennawn leh phawt an rêl. Meeting chuan, MLP Rules ennawn turin committee a din nghal a, chairman chu deputy CM Tawnluia niin, vice chairman chu Excise & Narcotics minister Dr K Beichhua a ni.
Committee member-te chu - School Education minister Lalchhandama Ralte, IPR minister Lalruatkima leh Law & Judicial minister TJ Lalnuntluanga te an ni a; a ṭul angin Mizoram Kohhran Hruaitute Committee (MKHC), Central YMA, MUP leh MHIP aiawhte sàwm tura tih a ni.
Vanglaini palai zawhna chhangin Excise & Narcotics secretary KT Beicho chuan, committee chu ṭum khat an ṭhutkhawm tawh thu a sawi a, "Ṭhutkhawm ṭum hian MKHC aiawhte an tel lo. Ṭum khat ṭhutkhawm leh a nih chuan peih theih a nih ka beisei. MKHC aiawhte hi tel ngei se kan duh a, ṭhutkhawm leh dawnah chuan tel ngei turin kan ngen ang," a ti.
December 19, 2019-a tihchhuah tawh MLP Rules chu sût a nih hnuah ennawn a ni a, zu zawrh phalna ang chi chu ṭhiah vek niin, Hnahlan leh Champhaia grape winery-te tan remchang siam tum a ni.
MLP Rules duan thar chu Excise & Narcotics department chuan notification hmanga tihchhuah an tum a; mahse, Council of Minister chuan ennawn leh tura thutlukna a siam angin, ennawn leh a ni.