Aizawlah lirtheia veivâk an pung Inkhuahkhirhna zâwm lo an la awm

Covid-19 hripui darh zel tur venna atana Mizo­ram sorkarin Aizawl leh district khawpuia hman tur inkhuahkhirhna thupek a siam chu zawm mumal lohna hmun a la awm nual. Aizawlah chuan Thawhlehni aiin niminah lirthei veivâk a tam zawk.

Inkhuahkhirhna thupek hi hman ṭan hun, April 20, Thawhlehni khan Aizawl leh Mamitah chiah zawm a ni a; district dangah chuan thuneitute'n Thawhlehni chhunah meeting an ko a, niminah an zâwm ve ṭan a ni. Hetih lai hian, in­khuah­khirhna thupek hi Aizawla an zawm ṭhat angin district dangah chuan ṭha taka zawm a ni lo tih Vanglaini palaiin district hrang hranga a biakte chuan an sawi.

Aizawlah chuan inkhar­khipna kalpui ṭan ni Thawh­lehni khan lirthei leh mihring veivâk awm nual mah se, a tam vak lo a; niminah erawh chuan Thawhlehni aiin lirthei leh mihring veivâk an pung hle. Dâwrte erawh chu inkhârkhipna thupekin hawn a remtih chin bak inhawng a awm lo. Ni tin eichawp dawrte erawh chu a awmna veng local task force-te ruahman angin hawn a ni.

Vanglaini palaiin Traffice police duty a kawmte chuan, lirthei veivâk a punga an hriat thu an sawi vek a, "Kan endik a, phalna nei an ni zel. Phalna nei tam ber chu local task force aṭanga phalna neite an ni," an ti.

Aizawl khawpui chhungah chhunah chuan traffic police an duty ber a; hmun ṭhen­khatah chuan armed police duty-te nena an duty hona hmuh tur pawh a awm. Zan lamah erawh armed police duty hmuh tur an tam thung.

Champhaiah chuan dawr hawn a ni a, mahse, mipui páwn chhuak tur tan phalna neih a ngai thung. Kolasib-ah chuan dâwr khâr a nih lo a, lirthei veivâk pawh khuahkhirhna a awm lo. Hnahthialah chuan inkhuah­khirhna zawm a la ni lo a, nimin chawhnu khan DC hoin ṭhutkhawm a ni.