Vanglaini - Bawhhlawh sawngbawl dan thlir lêt

KHAWTHLIR

MST bus hun

Transport department chuan, mipui tana remchan zawkna vangin Aizawl-Silchar MST bus service chu chawhnu dar 1-a chhuak tawh loin, zing dar 6-ah a chhuak ṭhin dawn tih a tarlang. Hei hi vawiin aṭanga hman ṭan a ni ang.

Medal lawmpui

Mizoram State Sports Council (MSSC) chuan nimin khan an office-ah tun hnaia infiamna chi hrang hranga Mizoram tana medal dawngtute chawimawimna hun an buatsaih a, Mizoram Commission for Women chairperson Vanlalawmpuii Chawngthu, MLA-in a hmanpui.

MCCF din cham

Mizoram Cancer Care Foundation chuan vawiin chawhma dar 11-ah Zemabawka Mizoram State Cancer Institute-ah an din champha an lawm dawn a, an member-te a tam thei ang ber kal turin an insawm.

Training buatsaih

World Vision India, Chhimtuipui ADP chuan nimin khan Lawngtlai Press Club-ah an area chhunga ṭhalai, thil chi hrang hrang training tura an thlante tan training an buatsaih. Training tura thlante chu puanṭhui zirtur mi 24, computer zirtur mi 12, motor khalh zirtur mi pahnih leh mechanic zir tur mi pahnih an ni.

Women’s Day

Mizoram University-a Public Administration buatsaihin nimin khan MZU-ah International Women’s Day an hmang a, 'Women in governance and their participation in politics' tih thupui hmangin workshop buatsaih nghal a ni. International Women’s Day hmannaah hian MZU vice chancellor Prof. R Lalthantluanga khuallian a ni a, zirtirtu leh zirlai ṭhahnem tak an tel. International Women’s Day hi March 8 a ni a, Pathianni a nih avangin niminah an hmang a ni.

Ruihhlo man

Excise & Narcotics department chuan nimin khan Edenthar-ah Lalruatthanga (23), Phunchawng Veng nia insawi hnen aṭangin heroin grams 3.15 an man. Lalruatthanga hi thubuai siam sak a ni.

DAWNTISEI

Bawhhlawh sawngbawl dan thlir lêt

SIPMIU chuan nimin khan Aijal Club-ah Aizawl khawpuia veng pangaa bawlhhlawh sawngbawl dan thar a kalpuina (pilot project) thlirletna hun an hmang.

Meeting hi SIPMIU deputy project director Lalthanzuali'n a kaihruai a, AMC executive councillor Lalzirliana'n a hmanpui. AMC lam aṭangin Tuirial Resource Centre-a bawlhhlawh sawngbawl dan an sawifiah a, Lengpuia Vermizo Society-in bawlhhlawh an sawngbawl dan an sawi bawk.

Vermizo Society hian bawlhhlawh an khawnkhawm tawh chu 407 truck trip 157 a ni a, chung zinga trip 12 chu leiṭha atana siam tlak loh ṭawih thei lo a nia, trip 145 chu sawngbawl hnua leiṭha leh thil dang siamna tura hman theih a ni. August 2014 leh March 2015 inkarah leiṭha quintal 390 an siam chhuak a, thla khata sum an lak luh chu chawhrualin Rs. 55,771.43 a ni.

Faina leh thianghlimna kawnga hmasawnna tur pilot project hi Aizawl Veng panga - Chawnpui, Kanan Veng, Laipuitlang, College Veng leh Nursery Vengah August 2014 aṭangin kalpui ṭan a ni. Veng pangaah hian bawlhhlawh ṭawih thei leh ṭawih thei lote thliar hrangin, mumal taka sawngbawl a, sum a chantir a ni. He pilot project hi thla ruk atan ruahman a ni.

Bawhhlawh paih dan thar, ṭawih thei leh ṭawih thei lo thliarna hi Aizawla veng 83-ah kalpui turin hmalak mek a ni a; DPR pawh pawm tawh niin, sanction order nghah mek a ni.

Share this Post

Login to comment

No Comments