Kawnpui-Buichali ah zangnadawmna Cheng nuai 100-a a tlem theih beisei

Kawnpui leh Buichali inkar NH-54 zauhna atana ram tihchhiat chu nimin khan PWD, Land Revenue & Settlement department, Awithangpa Group YMA leh ram neitute'n an teh ṭha. Mi pariatte zangnadawmna dilna an hnâwl a, zangnadawmna atana sum ngai tur zat pawh cheng nuai 100 vela a tlâkhniam beisei a ni.

Kawnpui-Buichali inkar kawng laihna atana ram lak neitute chu zangnadawmna pek vek an ni tawh a, mahse hriat lâwk loha lei laih avangin huan min, kawng nâl lai hêlna siamna atana ram laksak, leivûngin thlai a tihchhiat leh thil dang anga zangnadawmna phût mi 96 an awm a ni. Mi 96 zinga 20 chuan lei laih vangin an ram a chhia niin an sawi a, mi 76 chu leivungin an thlai a tihchhia niin an sawi.

Mi 96-te'n zangnadawmna an beisei zat belhkhawm chu cheng nuai 264 a ni a; nimina an teh ṭhat hnuah cheng nuai 100 vela tihhniam theih beisei a ni. Ram tehnaa document pawimawhte chu Revenue department bawhzui atan an dah.

Revenue department chuan Kawnpui-Buichali inkara mi 96-te ram chu kum 2014-ah an lo endik tawh a, chung zinga panga chu a dika ngaih a nih avangin nimina endiknaah tel a ni lo. Environment & Forest department plantation huam chhunga periodic patta pakhat leh V/C pass awm chu E&F-in an sawisel avangin sorkar ngaihtuah zui turin an dah.

Tarlan tawh angin, March 2, 2015 khan Sairang to Buichali Land Owners Association chuan zangnadawmna phûtin NH-54 kawng siamtute hna thawk tur an dang a, ram teh ṭhat leh tura tih a nih hnuah an ṭîn a ni.


Share this Post

Login to comment
No Comments