Lungleiah smart card siamna hawng

Transport secretary Hrangtawna chuan nimin khan Lunglei DTO Office-ah driving licence leh motor registration-te smart card hmanga thlakna a hawng. Hrangtawna chuan, smart card hmangin lirthei bo-ah harsatna awlsam zawka chinfel theih a nih dawn tih a sawi.

Smart card thlakna inkhawm hi Transport director L Biakthanga'n a kaihruai a; Hrangtawna chuan driving licence leh motor registration chu smart card hmanga tih vek tur a ni tih sawiin, "Computer-ah smart card neitu nihna kimchang taka chhinchhiah a ni ang a, India ram khawi hmun aṭang pawhin a hriat thei dawn a, tawhsual tawh leh lirthei bo chungchangah harsatna awm ṭhin tam tak chu smart card hman a nih chuan awlsam zawka chinfel a ni thei dawn a ni," a ti.

Lungleiah hian smart card siam hna hi M/s A-ID System Pvt. Ltd, Mysore-te'n an thawk a; nikum aṭangin hna an ṭan a, khawl ṭhat loh vangin hun eng emaw chen an chawlhsan hnuah khawl thar nen an inbuatsaih a ni. Lunglei khawpuiah hian motor registration 474 leh driving licence 1010 smart card hmanga thlak tawh a ni.


Share this Post

Login to comment
No Comments