Rocket hmanga Israel beihnaah mi paruk hliam

Gaza Strip aṭanga nimin zinga rocket hmanga Israel beihnaah mi parukin hliam an tuar.

Nimin zing khan Sharon biala chengte chuan thil puak ri ring tak hi an hriat thu sawiin, he thil thlen hnu hian siren pawh tihrik a nih thu an sawi. Israel sipaite chuan he thil hi Gaza Strip aṭanga rocket kahchhuah a nih thu sawiin, an chhui chiang nghal tih an sawi.

Police-te chuan rocket puak hian in pakhat tikangin mi parukin hliam an tuar tih an sawi a ni.

Ni 10 liamtaah khan Gaza Strip aṭang hian Tel Aviv lamah rocket kah a lo ni tawh bawk a, mahse Hamas hruaitute chuan he thil hi tihpalh thila thleng a ni tih an sawi. Nimina rocket kaptu hi eng pawl nge tih hriat a ni lo a, Gaza Strip hi Hamas rorelna niin, helpawl eng emaw zat an awm a ni.

Israel beih a nih avang hian US-a cham mek, Prime Minister Benjamin Netanyahu chuan a cham hun pawh a tihtawi phah a, vawiina APIC conference-a a thu sawi tur leh, Congress hruaitute kawm a tum pawh a ṭhulh.

Netanyahu chuan Israel mite beihna a thleng a, hei hi na takin kan chhang let dawn a ni, tiin President Trump nen an inkawm zawhah Israel ramah kir nghal a tum tih nimin khan a sawi.

Israel-in a beih let an hlauhthawn vangin Gaza-a Hamas official-te chuan sorkar hmun pawimawhte an chhuahsan nia sawi a ni. Hamas chuan Gaza-a a hotu, Yehiya Sinwar pawhin vantlang hmaa thu a sawi tur pawh a ṭhulh tih an sawi.