Vanglaini - CADC sorkar ṭhiat turin Larsap ngen

KHAWTHLIR

MST bus hun

Transport department chuan, mipui tana remchan zawkna vangin Aizawl-Silchar MST bus service chu chawhnu dar 1-a chhuak tawh loin, zing dar 6-ah a chhuak ṭhin dawn tih a tarlang. Hei hi vawiin aṭanga hman ṭan a ni ang.

Medal lawmpui

Mizoram State Sports Council (MSSC) chuan nimin khan an office-ah tun hnaia infiamna chi hrang hranga Mizoram tana medal dawngtute chawimawimna hun an buatsaih a, Mizoram Commission for Women chairperson Vanlalawmpuii Chawngthu, MLA-in a hmanpui.

MCCF din cham

Mizoram Cancer Care Foundation chuan vawiin chawhma dar 11-ah Zemabawka Mizoram State Cancer Institute-ah an din champha an lawm dawn a, an member-te a tam thei ang ber kal turin an insawm.

Training buatsaih

World Vision India, Chhimtuipui ADP chuan nimin khan Lawngtlai Press Club-ah an area chhunga ṭhalai, thil chi hrang hrang training tura an thlante tan training an buatsaih. Training tura thlante chu puanṭhui zirtur mi 24, computer zirtur mi 12, motor khalh zirtur mi pahnih leh mechanic zir tur mi pahnih an ni.

Women’s Day

Mizoram University-a Public Administration buatsaihin nimin khan MZU-ah International Women’s Day an hmang a, 'Women in governance and their participation in politics' tih thupui hmangin workshop buatsaih nghal a ni. International Women’s Day hmannaah hian MZU vice chancellor Prof. R Lalthantluanga khuallian a ni a, zirtirtu leh zirlai ṭhahnem tak an tel. International Women’s Day hi March 8 a ni a, Pathianni a nih avangin niminah an hmang a ni.

Ruihhlo man

Excise & Narcotics department chuan nimin khan Edenthar-ah Lalruatthanga (23), Phunchawng Veng nia insawi hnen aṭangin heroin grams 3.15 an man. Lalruatthanga hi thubuai siam sak a ni.

DAWNTISEI

CADC sorkar ṭhiat turin Larsap ngen

Chakma District BJP president Shanti Jiban Chakma chuan nimin khan Mizoram Governor hnenah lehkha thehlutin, Chakma Autonomoud District Council (CADC) Executive Committee chu ṭhiat turin a ngen.

Shanti Jiban Chakma chuan, CADC-a V/C nominated member inruat dan chu dan kalh leh democraty kalphung kalh niin a tarlang a, CADC-a Congress sorkar thiltih dan chu Constitutional kalh niin a sawi a ni.

Shanti Jiban Chakma chuan, Gulsingbapsora, Baganpara leh Longpuighat-II a VC president thlan leh ruat danah thil dik lo a awm thu te, V/C inthlana BJP-in hnehna an channa khaw ṭhenkhatah CADC sorkarin dik lo taka thil a tih thute a tarlang a; CADC Executive Committee chu sum enkawl kawngah an hlawhchham nia sawiin, sorkarin leiba tam tak a nei niin a tarlang bawk.

Chakma district BJP president chuan, CEM Buddha Lila Chakma kaihhruai CADC sorkar chu kawng hrang hranga hlawhchhamah puhin, a rang thei ang bera ṭhiat turin Mizoram Governor a ngen a; V/C ṭhenkhata dan kalha nominated member ruatte chu sûttir turin a ngen bawk.

Share this Post

Login to comment

Latest Comments (1)

jboytloong - 10th Mar 2015 09:38:42 AM

Sawrkarin modernization of Kamalanagar Town atana Rs Vaibelchhe 3 (?) a pek te kha an hmanna hmuh tur a va tlem teh reng em! Ka hmuh chinah kawngpui 4 Kms ve metal leh Traffic Point tangkai lo zet zet, chhe zet zet, duty tur pawh awm chuang lo an siam ve khu a ni mai. Vanglaini hian RTI Act hmangi zawt teh u.