Mizoram pum zau zawng aṭang teha 44% chu mau awmna a ni a; Lunglei district leh Mamit district-ah mau a tam ber. Environment & Forest department chuan Mizoramah mau chi hrang 35 a awm niin an chhinchhiah.

E&F department hnuaia National Bamboo Mission Society (NBMS)-a an hotu, Lalthangliana Murray, chief conservator of forest chuan, Mizorama mau awmsa ṭhenkhat chu hralh suma chantir dawnin a hlâwk tawk lo nia sawiin, kum 2006-07 aṭangin Mizoram Bamboo Mission hnuaiah mau chi ṭha bik chìn ṭan a nih thu a sawi.www.vanglaini.org

Lalthangliana Murray chuan, ram dang aṭanga lak luh maute chu reserve forest chhungah an chíng a, reserve forest páwn lamah mimal chíng duhte hnenah ṭanpuina an pe ṭhin tih a sawi a; chhungkaw pakhat tan hectare khata zauah Rs. 4,000 zel an pe a, chhungkaw ṭhahnem tak an pe tawh niin a sawi.

Bamboo Mission hnuaia mau chìn ṭhin kum 2010 aṭangin NLUP-ah an let a, NLUP hnuaiah chhungkaw 3,281-in mau an thlang. NLUP hnuaiah hian sorkar department ram âwl nei leh NGO hrang hrangte hnenah ram hectare khatah Rs. 8,000 zel pein, hralh suma chang thei chi mau chìn nan ṭanpuina an pe ṭhin.

Mau leitute'n mau rih zawng bûka an lei ṭhin avangin Mizorama mau awmsate chu hralh atan a hlawk tawk lo nia sawiin, Lalthangliana Murray chuan, mau chhah chi Tulsing, Balcoa, Bamboosa-te an chìntir niin a sawi a, "Mau lian chi Rawṭhing, Rawnâl, Phulrua leh Rawmi te pawh kan chintir bawk a, Mau hmanga mimalin hlâwkna an lo tèl a, eizawnna an neih theih hi kan duh a ni," a ti. www.vanglaini.org

Mau chìn chu a rah seng an awm tawh nia sawiin, Lalthangliana chuan, "Kum khatah nuai chuang la lutte pawh an awm a, Central aṭanga fund kan hmuh theih lai chuan hmuh zel a, ṭan lak zel kan duh," a ti. National Bamboo Mission kalpui aṭanga hun eng emaw chen chu hectare 5,000-6,000 atana hman tur pawisa an dawng a, kumin sorkar kum kal laiah hectare 500 atan chiah an dawn thu leh, an pawisa dawn aṭangin bamboo industry-te hnenah cheng nuai 100 vel an sem ral ṭhin niin a sawi.

MIRSAC-in an chhût danin, Mizoram E&F division zingah Kolasib divison chhunga reserve forest-ah mau pum vaibelchhe 12 chuang awma chhûtin, a tam bera ngaih a ni a, chung zinga vbc. 5 chu a puitling, hralh theiha ngaih a ni. Kawrthah division chhungah pawh vbc. 12 vel awma ngaih a ni bawk.www.vanglaini.org

E&F department hotute chuan, boruak thianghlim siam chhuah kawngah ram zau zawng inangah mau hmunin 35%-in a thawh hlawk zawk a, tuihna tihpun kawngah pawh a thawh hlawk hle niin an sawi a; "Mau hectare khat hmun hian fûr laiin tui litre 30,000  vel a khâwl khawm theia chhût a ni a, ṭhál laiin zawi zawiin a luang chhuak leh ṭhin a ni," an ti.

---

Share this Post