World Bank-in Mizoram hnenah cheng nuai 28,000 a pe dawn

World Bank chuan hriselna lama Mizoramin hma a sawnna tur, Mizo­ram Health System Strengthening Project (MHSSP), US dollar maktaduai 40 (nuai 400) hû a pawm.

Thu dawn danin, US dollar nuai 320 chu World Bank tum tur a ni a, chu chu India pawisain cheng nuai 28,000 a ni. Dollar nuai 80 chu Mizoram sorkar tum tur a ni thung. World Bank hian US dollar nuai 320 hi loan-in a pe chhuak dawn a, 90% chu sorkar laipuia Ministry of Finance hnuaia Department of Economic Affairs (DEA) tum tur a ni a, 10% chu Mizoram sorkarin a tum dawn.

MHSSP atan hian Health minister Dr R Lalthangliana chuan kum 2019 khan USA-ah World Bank headquarters hotute a dawr a, chumi hnuah India rama World Bank hotute ṭum hnih a dawr leh bawk. March 5, 2021 khan World Bank office, Delhi-ah DEA, World Bank leh Mizoram sorkarin negotiation meeting an nei a, agreement ziah a ni.

Mizoram sorkar aiawhin MHSSP pro­ject director Dr Eric Zomawia'n hming a ziak a, DEA aiawhin director Hanish Chabbra leh World Bank aiawhin senior operation officer Bathula Amith Nagarai-te'n hming an ziak. Project-in a tum ber chu Mizorama health system kalphung tih­changtlun leh tihhma-sawn a ni.

Health minister Dr R Lalthangliana hnen aṭanga thudawn danin, MHSSP atan hian committee pathum - Chief Secretary kaihhruai Project Steering Committee, Health Secretary kaihhruai Project Executive Committee leh MHSSP Project Director kaihhruai Project Management Unit-te din a ni tawh.

MHSSP hi kum 2021-2025 chhunga zawh tum a ni a, hlâwm thumah ṭhen a ni. Hlâwm ṭhente chu - Mizoram damdawi-inte nen internal performance agreement siama sorkar damdawi-inte'n mipuiah service ṭha leh zual pek te, Mizoram Health Care Scheme leh health insurance scheme dang awmte mipuiin tun aia ṭangkai lehzuala an chhawr theih tura hmalakte leh, mipuite'n tun aia ṭangkai lehzuala health service an dawn theihna turte a ni. Heng bakah hian, a ṭul dan azira hman turin Contingent Emergency Response Component dah a ni bawk.