Zote South-in Serchhip dist.-a awm an duh

Lunglei district-a awm Zote South khawtlang chuan, Hnahthial district tihpuitlin a nih pawhin, Hnahthial district-a awm an duh lo a, Serchhip district-a awm an duh zawk thu an puang.

Zote South V/C hotu te, YMA, MHIP leh MUP hruaitute chuan June 26, Thawhlehni zan khan YMA Rûnah YMA president PC Lalṭanpuia kaih­hruaiin joint meeting an nei a; Hnahthial district-a awm an duh loh thu leh, Ser­chhip district-a an awm chu an khaw­tlang tan a ṭhat ber avangin Serchhip district-a an awm theih nan a tàwp thlenga hmalak an tum thu, resolution siamin an tarlang a ni.

Joint meeting chuan, Serchhip district-a an awm theih nana an hmalak tawhnate thlirin, an duhnate chu chief minister Zoramthanga hnenah vawi hnih an thlen tawh thu te, Chief Minister chuan a khaw neitute duh dan anga an kal tur thua a lo chhan avanga an lawm thute an tarlang. Serchhip district-a awm chu YMA Vantawng Group leh Serchhip Sub-Hqrs. conference rorel a nih an sawi.

An resolution-ah chuan, Chief Minister hnena an lo thlen tawh angin, district headquarters thar tur Hnahthial chu a hlat avang te, a panna kawngpui a buaithlak avang te, Hnahthial kal turin Serchhip khua bakah Serchhip district chhunga khaw pahnih kaltlang hmasak zel a ngaih thu te, Lunglei district-a khaw pathum kaltlang zel a ngaih thute an tarlang.

Hnahthial district-a awm chu an tan kawng tinrengah a ṭha lo zawk a, harsatna siam belhtua an ngaih thu an sawi a; chutih laiin, an khua aṭangin Serchhip chu km. 40 chauha hla a awm a ni a, kal a awlsam zawk hle tih an sawi a ni.