Mamitah ruihhlo dona kawngzawh

Nimina International Day Against Drugs Abuse and Illicit Trafficking pualin Mamit khawpuiah zirlaite'n ruihhlo dona kawngzawh an nei a, zirlai ṭhahnem tak telin, Mamit bawrhsap Dr Lalrozama'n a hmanpui.

Ruihhlo dona kawngzawhah hian Mamit Higher Secondary School leh Mamit High School zirlaite an tel a, ruihhlo duh lohna thuziak kengin, High School Veng aṭanga Charkawn thleng kawng an zawh a, Mamit Presbyterian Kohhran Hall-ah inkhawm an nei chhunzawm a ni.

Dr Lalrozama chuan, ruihhlo do kawngah mimal, khawtlang leh sor­karte an ṭan tlan a ngaih thu a sawi a; ruihhlo chu ṭhalaite leh naupangte engmah ni loa siam theitu, nun titawitu a ni tih hriaa ruihhlo laka fihlim tur leh ruihhlo do tlat turin zirlaite a chah.

Damdawi hman sual leh ruihhlo dona ni hi Lungleiah chuan School Education department buatsaihin Convention Center-ah hman a ni a, Lunglei bawrhsap K Lalrinzuali'n a hmanpui. Bawrhsapin thu a sawi bakah, Lunglei chief judicial magistrate Julie Lalrinzami, additional SP Lalchhuanthanga, deputy drugs controller Lalchhandama leh SDEO Micky Lalenkawla ten thu an sawi.

Assam Rifles 23 Sector pawhin International Day Against Drug Abuse and Illicit Trafficking hi an hmang bawk.