Police leh Kohhran Upa kutthlak Mizoram police-te'n pawi an ti

Mizoram Police Subordinate Officers' Association (MPSOA) chuan thuchhuah siamin, an member pui June 21, 2019 zanah Chanmari kâwna sawisak rawn a ni leh remna siam tum Chanmari venga kohhran upa na taka kutthlak rawn a ni chu pawi an tih thu an tarlang a; buainaa mawhphurtute lakah dikna hlen chhuah ngei a ni theih nan sorkar thuneitute leh YMA-te an thawhpui tlat dawn thu an puang.

MPSOA chuan, tun hnaiah Mizoram hmun ṭhenkhatah tleirawl rualin mi kut thlak rawn an chíng chu pawi an tih thu sawiin, "Buainaa inhnamhnawih hi tleirawl hma lam hun duhawm tak neite zan khat thil thua an nunkhua an tihchhiat vek theihna a nih avangin, hetiang sualna punlun mek do tur leh venpui turin nu leh pa zawng zawng kan ngen a ni," an ti.

A huhoa dan bawhchhiatna a thlenin, MPSOA chuan press release hmangin mipuite dan hrilhfiah pahin ngenna an siam tawh ṭhin tih an sawi a; dan bawh­chhiatna laka mipuite inthiar fihlim tur leh social media hmanga thu belhchian dâwl lo leh buaina tipunlun thei tidarh lo turin an ngen a ni.

MPSOA chuan, Mizoram police-te leh YMA-te chu sual dona kawngah ṭha takin an thawkho zel tih sawiin, ṭha taka an thawhho zel pawh an duh thu an tarlang a, "Khua leh tui ṭhate'n an tih âwm tak ti zel a, ruihhlo leh tharum thawhnain kan ram a nuai mek do let tur leh venpui turin kohhran leh tlawmngai pawl zawng zawng kan ngenin kan sáwm a ni," an ti.