KHAWTHLIR

INC member C Ngunlianchunga zawhna chhangin ni 15.12.2018 aṭanga ni 30.4.2019 chhungin ways & means advance vawi khat lak a nih thu finance changtu chief minister Zoramthanga chuan House a hrilh. Zoramthanga tarlan danin, ni 2.4.2019 khan ways & means advance hi cheng nuai 54 lak a ni. Hetihlai hian May, 2016 leh November, 2018 chhungin Mizoram sorkarin ways & means advance a la lo.

Serchhip Field Veng Branch KṬP chuan nimin khan an kohhran hall-ah blood donation camp an huaihawt a, Serchhip District Hospital tan thisen unit 20 an pe a, a petute hmeichhia 12 leh mipa pariat an ni.

INC member C Ngun-lianchunga zawhna ziaka chhangin finance changtu chief minister Zoramthanga chuan kum 2019-2020 Mizoram budget aṭanga sorkar hnathawk hlawh zat percentage chu 39.62% a nih thu a tarlang.

Aizawl Sub-Divisional Magistrate chuan thupek chhuahin, Mizofed Petrol Pump chhehvela dan kalha petrol zuartu zawng zawngte chu inthiarfihlim turin a hriattir a, "He thupek zawm lova tiluitu chu Section 188, IPC hmanga hrem theih a ni," a ti. Thupek hian thla hnih chhung a huam phawt ang.

Kolasib DC Zoengsanga hoin nimin khan a pisaah an district-a economic census neih tur chung-chang sawiho a ni. Kolasib DC chuan economic census chu ei leh bar zawnna kawnga inhnamhnawihte chipchiar taka zirchianna tur a nih thu sawiin, "India ram bakah state economy dinhmun hriat chianna tur a nih avangin a pawimawh hle," a ti.

Aizawl Young Men’s Christian Association (YMCA) chuan nimin khan PWD E-in-C conference hall-ah khawmpui an hmang a, khuallian minister Dr R Lalthangliana’n a hmanpui. Khawmpui hi Aizawl YMCA president PC Zoram Sangliana'n kaihruaiin, general secretary K Lalsawmvela chuan Aizawl YMACA chanchin leh dinhmun tlangpuite a sawifiah.