Parliament-ah CAB dodalin Ronald Sapa a au chhuak

Mizoram MP (Rajya Sabha) Ronald Sapa Tlau chuan June 25, Thawhlehni tlai khan Parliament session-ah thu a sawi a; Mizoram mipui Citizens Amendment Bill (CAB)  an duh loh thu leh tharthawh leh pawh an duh loh thu a au chhuahpui.

Ronald Sapa Tlau chuan, CAB chu parliament-in a duan tirh aṭangin India hmarchhak state hrang hranga mipuite'n nasa taka an dodal thu sawiin, "CAB hi Parliament-ah a thi tawh a, chutih laia he sorkar tharin thar thawh leh a tum hian min tina hle a ni," a ti a; CAB chu a puitlin chuan Bangladesh-a Chakma foreigner-te Mizorama hruai luttu tur a nih thu a sawi.

Rajya Sabha MP chuan, Chakma-te chu Mizoram mi dik tak an nih ngai loh thu te, Mizorama Chakma pun chak dan chu inthlah pun dan pangngai a nih loh thu leh Bangladesh aṭangin a rûkin tam tak Mizoramah an lut nia an hriat thu te, Mizoram-Bangladesh ramria duty BSF-te'n Chakma foreigner an man ngai loh thu leh thawn kîr an neih ngaih loh thute a sawi bawk.

Ronald Sapa chuan Myanmar-a Rohingyas-te (Muslim) hmaih luih an nihlaia Bangladesh-a Buddhist-te Mizorama an luha Mizote min chimral theih dan tur an duanna ang hialah CAB chu ngaih a nih thu a sawi chhuak a; Mizorama Mizote chu Kristian kan nih avangin sorkar laipui hian kawng hrang hrangah a en hrang ṭan nia inngaihna a lian sawt hle tih a sawi bawk a ni.