KHAWTHLIR

State Medicinal Plant Board-in Thenzawla Integrated AYUSH Hospital bula nursery an siam aṭangin Thenzawl Medicinal Plants Grower Society member, ramhmul damdawi chíngtu mi 36 hnenah July 8, Thawhṭanni khan ramhmul damdawi chi khat, Archangkáwm ṭiak sem ṭan a ni. Sem ṭannaah hian chhungkaw 20 hnenah Archangkawm ṭiak 60 zel pek a ni a, a ching duhte hnenah la sem zel an tum. Thenzawl Medicinal Plants Grower Society-ah hian member 100 vel an awm a, an hmalakna hmasa atan State Medicinal Plant Board chuan ramhmul damdawi - Anchiri, Sunhlu leh Ar­changkáwmte hmanga bul ṭan turin an ti a ni.

Zo Reunification Orga-nisation (ZORO) chuan thuchhuah siamin, Cabinet meeting-in Mizorama tualṭo hnam (indigenous people) chu Zo fate (Zo ethnic group) chauh an ni’ tia thutlukna a siam leh, ‘Mizoram hmar lam ramri chu Inner Line Regulation 1875-in a sawi ang hi a ni’ tia thutlukna a siam chu lawmawm an tih thu an tarlang. "Inner Line Regulation 1875-in ramri a sawi ang hi Mizote hriat leh tel vena ramri a ni a, a hnu lama ramri sawi reng reng chu Mizote right palzûta inpáwngnêkna a ni," an ti.

Information & Public Relations department leh Mizoram Art Deve-lopment Society chuan nimin khan Art Novelty Gallery, Chaltlangah Annual Art Workshop 2019 an buatsaih a, IPR director Lallianpuii'n a hawng. Lallianpuii 

chuan, artist-te kut chhuak lemziak leh kermawite'n thu tam tak an sawi tih sawiin, “Ṭhalaite talent hai chhuahna ṭha tak, sual laka an nun veng theitu leh eizawnna ṭha siam­sak theitu a ni," a ti. Workshop-ah hian July 12, 2019 thleng a awh ang.

Ministry of Housing & Urban Affairs hnuaia flagship programme September 24, 2013 aṭanga bul tan Deendayal Antyodaya Yojana - National Urban Livelihoods Missionchungchang chu nimin khan Kolasib DC Zoengsanga hoin DC conference hall sawiho a ni. DC chuan sorkar laipui aṭangin emaw state sorkar aṭangin scheme hrang hrang kalpui tur a awm ṭhin tih sawiin, "Heng scheme-te hlawhtlinna bulpui chu scheme kaih-hnawiha mawhphurna neite thawhona ṭhaah a innghat a ni," a ti.