KHAWTHLIR

Aizawl Civil Hospital medical superintendent chhuak ta Dr KL Remsanga chu Downtown Hospital, Guwahati, Assam chuan Prof. Jogesh Mahanta Memorial Award an hlan. Award hlanna inkhawm hi ITA, Machkhawa, Guwahati-ah February 15, 2019 khan neih a ni a; medical and health service lama thawk ṭhate hnenah an hlan ṭhin a ni.

Central YMA hnuauia SRS, Excise & Narcotics department leh Assam Rifles mite chuan Pathianni zan zanlai pelh hnu khan Aizawlah Methamphetamine (Meth) mûm 1,00,000 an man a, a neitua puh cement mistiri, Farug Uddin (26) s/o Wahida Begum, Patharkandi, Karimghanj pawh an man nghal. Meth hi mûm khat Rs. 350 man a ni a, chumi rate-a chhût chuan Pathianni zana an man hi Rs. 3,50,00,000 man a ni.

BJP, Mizoram Pradesh chuan nimin khan Aizawla an pisaah February 14, 2019-a Pulwama, Jammu & Kashmir-a mi firfiakte'n thihchilh bomb hmanga an beih vanga thi CRPF sipai 40-te sûnna hun an hmang.

Power & Electricity dept. chuan thuchhuah siamin, Power House-a transformer pakhat a chhiat avangin siamṭhat a nih hma chuan Electric Veng, Chanmari, Chhinga Veng, Saron Veng, Zarkawt, Dawrpui, Tuithiang, Treasury, Laipuitlang leh Armed Veng-te chu inên chhawk a ngaih dawn thu an tarlang.

Siaha DC thar, Buhpesh Chaudhary, IAS chuan nimin khan a pisaah Siaha District MJA member-te a kâwm. Bupesh Chaudhary chuan, Siaha MJA-te'n sorkar thâ tichak turin 

ṭha takin an ṭawiawm tih a hriat thu sawiin, "Kan hma lawka MP inthlanna kan hmachhawn leh turah pawh in ṭawiawmna ka mamawh hle dawn a ni," a ti. 

Lalit Kala Akademi, New Delhi leh Art & Culture department ṭangkawp chuan nimin khan Tourist Lodge, Chaltlangah National Painting Camp an buatsaih. He huna khuallian, Art & Culture minister R Lalzirliana chuan, lemziak mite chu thil chhût leh chîk mi nia a hriat thu a sawi.