Khaw 5-in nuai 260 man serthlum an hralh

Mizoram khawchhak lam, Hrangturzo bial chhungah kum 2018 khan serthlum an hralh ṭha hle. Khaw pangaa mite'n kum kal taa serthlum an hralhna aṭanga sum an hmuh belhkhawm chu cheng nuai 260 vel a tling. Mimala hralh ram zualte'n cheng nuai 3-5 inkar vel an hralh tlangpui.

Hrangturzo bial chhunga khaw pangaa serthlum huan neitute'n an serthum tharte an hralh dan tlangpui chu - a hlawma vai hnena hralh leh mimala Aizawl leh khawpui danga zawrhte a ni a; serthlum huan neih chu tlang ram lo neiha eizawn aiin a hlâwk zawkah an ngai a, ṭhenkhat chuan man to zawka hralh theih an inbeisei.

Vanglaini palaiin a kawmnaah Lêng khua chu serthlum thar tam páwl a ni a, Léng Orange Grower Association secretary F Rohlupuia chuan, an khuaah serthlum kûng rah tawh 29,810 leh la rah lo kûng 25,990 a awm tih a sawi a, "Serthlum chíngtu chhungkua 157 awmin, chu'ng mite'n kum 2018-a serthlum an hralhna belhkhawm chu Rs. 80,06,200 a ni," a ti.

F Rohlupuia sawi danin, kum 2018-ah hian chawhrualin Leng khuaa serthlum chingtute'n Rs. 50,000 vel zel an hmu ang a ni. Serthlum chu mimala hralh awm tho mah se, vai sumdawng hnenah 80% vel an hralh. Hralh tam ber chu H Liantluang chuan Rs. 5,10,000 man a hralh a, ani hian serthlum kûng 700 vel a nei a ni.

Biate-ah chuan serthlum hmun nei chhungkua 150 vel an awm a, mahse, chhungkua 70 velin nikum khan serthlum an hralh a, cheng nuai 80 chuang an lei chhuakah an inngai.

Biate Serthlum Chingtu Association chairman B Lalremzuala chuan, "Kan chhinchhiah chinah cyeng nuai 70 vel man kan hralh a, a hnuah nuai nga man hralh te, hralh leh neuh neuhte an awm a, nuai 80 a chuang turah kan ngai," a ti a; vaiho hnenah leh khârchhawngte hnenah an hralh tlangpui tih a sawi.

B Lalremzuala sawi danin, vai hnena a hlâwma hralh tam ber R Lalhmingthanga chuan serthlum kûng 400 vel a nei a, nikum khan Rs. 3,70,000-in a hralh. 

Aizawla phura hralhtu pakhat H Lawmkima chuan Rs. 5,00,000 man vel a hralh a; ani hian serthlum kûng 900 vel a nei a, kûng 600 chuang hret a rah a ni.    

East Lungdar khuaah chuan chhungkua 280 velin serthlum hmun an nei a, kum 2018 khan cheng nuai 40 man vel an hralhah an inngai. East Lungdar Farmer Society secretary T Zirliana chuan, serthlum chu vaihoin a hlâwma an lak a tam ber a, Aizawl leh khawpui dangah zuarte pawh an awm tih sawiin, "A hralh tam ber Pu Hrangseia'n Rs. 5,00,000 vel man a hralh ," a ti.

T Zirliana chuan, KVK leh Horticulture department, North Vanlaiphai aṭangin serthlum enkawltute chu training pek an nih thu te, serthlum eitu rannung thahna hlo kahna an dawn ṭhat thu a sawi rualin, "Leiṭha leh tui lâkna tur pipe lamah harsatna kan tâwk a, enkawl a hautak deuh," a ti. Chuti chung chuan, serthlum huan neih chu tlang ram lo neih aiin a hlawk niin a sawi.

Mualcheng khuaa serthlum chingtu ṭhenkhat chuan an bial chhungah serthlum a tam avangin kuminah hralh a har deuh niin an sawi. Mualcheng khuaah hian chhungkaw 25-in serthlum hmun an nei a, nikuma an hralhna belhkhawm chu Rs. 11,07,000 a ni. Serthlumte chu vai hnenah an hralh ber a, Rs. 50,000 - 1,00,000 inkarin an hralh tlangpui. Hralh to ber R Liansanga chuan Rs. 2,40,000-in a hralh thung.

North Vanlaiphai khua pawhin serthlum an hralh nual a, N. Vanlaiphai Horticulture Office chhinchhiah danin, serthlum hralh an chhinchhiah tawh zat chu cheng nuai 49 chuang a ni tawh a, zau hniha mi an la chhinchhiah thei lo a, an hralh zawng zawng chu cheng nuai 55 man a tlin an ring.

N. Vanlaiphai Horticulture Office-a thawkte chuan, an bial chhung bika serthlum hralhte an chhinchhiah mek a ni.