Champhai MJA-in inkhawmpui an hmang

Champhai District MJA chuan February 15, Zirtawpni khan Champhai Press Club-ah inkhawmpui an hmang a, MJA General Headquarters president Zonunsanga Khiangte leh hruaitu dangte'n an hmanpui.

Zonunsanga Khiangte chuan, chanchinbumite chu mite'n thuthar an hriatna hnár an nih avangin thil thleng tharte zir chiang a, inzir reng tur an nih thu sawiin, "Nun dan mawi leh hawihhâwmna journalist-te nuna hmuh a ni ṭhin hian tun hma aia fimkhurna leh hmasawnna a thlen a ni. Sorkar hmalaknaa chanchinbumite tana project site visit leh press tour neih ṭhinte a hlawk thlak bakah, mipui hrilhhriatna leh ram tana  hmasawnna ruhrel rotling siamna tura ṭangkai tak a ni," a ti.

MJA President chuan, Mizoram journalist-te chu India rama inhlawm ṭha ber leh inpawhtlang tak an nih thu sawiin, member-te chu pawl dangte tana entawntlak tak nih tum theuh tura invawng turin a chah.

Champhaia IPRO Dr Lallawmkima pawhin thu sawiin, tunlai khawvel ṭhang zelah media-in pawimawhna a nei thûk telh telh tih a sawi a, "Chanchinbumite hian mipui siam sorkarah fawng pawimawh tak an chelh avangin thil rintlak loh leh thu puarpawleng mai maiah innghah loh a pawimawh. Mipui mit fûkna an nihna chanchinbumite'n an hriat thar leh fo a ṭul," a ti.

Inkhawmah hian Champhai district MJA president C Lalhnun-puia pawhin thu a sawi a, journalism chu dik lo taka hlâwkna zawnna atan hmang lo tura fimkhur a ngaih thu a sawi a ni.