MTSA-a thawkte'n inkhawmpui an hmang

Mizoram Tourism Service Association (MTSA) chuan February 15, 2019 khan Tourist Lodge, Chaltlangah inkhawmpui an hmang a, Tourism minister Robert Romawia Royte khuallian a ni.

Inkhawm hi MTSA president Saitluanga'n a kaihruai a; Tourism Minister chuan, khawvel a changkang telh telh a, miin hlimna an zawng nasa tial tial tih sawiin, "Mizoram hi ram dang aṭanga lo kal khualzinten hlimna an zawn hmuhna atan kan siam tur a ni. Mipui hîp thei turin kût leh programme hlimawm buatsaih ṭhin a pawimawh," a ti.

Robert Romawia chuan, Krismas hunpui laiin emaw, kum tina thleng thei tur event changtlung taka siam dan tur ngaihtuah ṭul a tih thu sawiin, "Páwn lam aṭanga zin mite tana awlsamna siamsak turin online booking system-te pawh tourist lodge-ah nei tura ṭan lak a ṭul," a ti a; khaw hrang hranga tourist lodge 15 sak mek, scheme tâwp tawh vanga sak chhunzawm theih lohte chu tihnun a, hman theih tura sak puitlin dan zawn a ngaih pawimawh thu a sawi.

Tourism secretary Esther Lalruatkimi pawhin thu sawiin, MSTA-te chu an inkhawmpui thupui 'Hma lam panin' tih a nih anga hmasawn zel turin a fuih a; service sector-a thawktu an nihna hre reng tura officer leh staff-te chahin, "Nangmahni dawrtu mipuite laka nêlawm tak leh inhawng taka awm dan thiam tur a ni a, publicity pawh uar zawka kalpui a ṭul," a ti.

Tourism department hian March-December 2018 thleng khan sorkar tan Rs. 2,42,84,091 an la lut a ni.